MCB ku oranan ekstendé pa duna asistensia ku MCB Mobile/Online Banking

Willemstad- MCB Mobile/Online Banking a anunsiá ku mardugá di 19 di yanüari ultimo nan a hasi un update den nos sistema di MCB Mobile/Online Banking. Lamentablemente esei no a bai manera kustumber i nan a enkontrá un problema ku a kousa ku un kantidat grandi di kliente a pèrdè akseso pa e servisionan aki sin por a drenta bèk den e sistema. MCB a duna instrukshon ku a yuda diferente kliente restablesé e servisio, pero lamentablemente esei no tabata e solushon pa tur, ya ku un kantidat grandi di kliente mester a tuma kontakto ku nan pa nan a registrá nan di nobo den e sistema. Esei por a tuma lugá sea na telefòn òf na un di nos brènchnan. MCB a adaptá nan orario di servisio pa por a sigui yuda klientenan ku a enkontrá e problema aki ya ku ta nan responsabilidat pa sigui ofresé nan klientenan e servisio di MCB Online/Mobile Banking ku nan a kustumbrá kune. Pa e motibu ei, mientras téknikonan ta kontinuá ku tur esfuerso pa haña e kousa di e problema ku nan a enkontrá, por fabor tuma nota ku a ekstendé e orarionan pa asistensia ku MCB Mobile/Online Banking. Awe djaluna 23 di yanüari e Brènch na Punda, Rio Canario, Rooi Catootje, Saliña i Sta. Maria ta habrí di 8:00AM pa 5:00PM i e Contact Center (466 1111) ta disponibel di 8:00AM pa 7:00PM. Esaki spesialmente pa asistensia ku MCB Mobile/Online Banking kual ta yama danki pa e konfiansa den Banko. MCB tin komprenshon pa e konsternashon ku nos a kousa pa kual nan ta pidi diskulpa pa e inkumbiniensia grandi ku esaki a kousa na hopi di kliente.