Deporte
MCB komo spònser prinsipal ta rindi homenahe: Na Selekshon Nashonal di sòftbòl femenino ku a gana medaya di Bròns na Argentina
WILLEMSTAD – Djabièrnè 8 di yüli MCB ku sumo plaser a rindi homenahe na nos sòftbolistanan ku a logra gana medaya di bròns na Buenos Aires, Argentina.
Maduro & Curiels Bank ya pa hopi aña ta spònser prinsipal di sòftbòl femenino ‘fastpitch’ aki na Kòrsou i e aña aki, ya pa di tres aña, ta spònser prinsipal di nos selekshon Nashonal di Sòftbòl.
Kòrsou su selekshon a kompetí pa e di 15 kampionato Sur Amerikano ku a tuma lugá na Buenos Aires.
Den e kampionato aki Kòrsou a logra derotá e selekshon fuerte di Peru den playoffnan ku skor di 7 pa 1 i asina optené medaya di Bròns.
Kòrsou a optené 2 medaya den e último 2 kampionato Sur Amerikano (Oro na 2019 i Bròns na 2022).
Esaki ta un logro impreshonante i di e forma aki sigur ta pone un stèmpel ku nos pais aktualmente ta un potensia den sòftbòl suramerikano.
Selekshon Nashonal di Sòftbòl ta sigui konta ku e sosten di Maduro & Curiel’s Bank, ku pa algun aña ta karga e proyekto deportivo aki i asina huntu por sigi kosechá éksito.