Mas ku 70 partisipante na Emmastad gòlf course Torneo di gòlf eksitante na benefisio di Krus Kòrá Kòrsou

WILLEMSTAD – Alrededor di 70 hungadó di gòlf tabata presentá na Emmastad golf course pa asina partisipá na e torneo di gòlf na benefisio di Krus Kòrá Kòrsou.
Shelu tabata un poko nubla pero nada no a stroba e partisipantenan, ademas e ambiente manera semper tabata sublime.
E dia a kuminsá ku mas o ménos 50 partisipante riba kancha i den oranan di mèrdia su ekselensia gobernadó interino sra. Michelle Russel-Capriles a kompañá miembro di direktiva Dorothy Sprockel, Antony Owers i Hans Berggraaf, pa e lansamentu maestral, promé ku e di dos grupo subi kancha.
Luna di mei ta e luna di kolekta di Krus Kòrá Kòrsou i e torneo di gòlf aki tambe a forma parti di e eventonan pa rekoudá fondo.
Krus Kòrá Kòrsou tur momentu ta para kla pa yuda nos komunidat na e momentunan di kalamidat òf otro situashonnan ku esei ta nesesario.
Tabata un sla enorme pa mira kon kandela a destruí e edifisio di Krus Kòrá na Suffisant na 2020.
E famia di Krus Kòrá a yora huntu, pasobra esaki ta nifiká ku a stroba e trabounan pa e komunidatnan ku Krus Kòrá ta sirbi.
Pero djis un ratu despues nos a realisá ku e yudansa na nos komunidat ta muchu mas grandi i importante, ku ni un kandela asina feros no por stroba Krus Kòrá sigui yuda.
E edifisio na Suffisant tabata un sede importante i sentral na Kòrsou, for di unda e organisashon por brinda yudansa na komunidat, eduká e boluntarionan i otronan ofresiendo kurso di promé asistensia, i hopi mas.
E kandela ta un kontra tempu grandi, sinembargo e asistensia ku Krus Kòrá ta brinda na komunidat ta sigui, kumpliendo ku e 7 prinsipionan básiko di e organisashon ku ta amor pa hende, naturalidat, imparsialidat, independensia, boluntat, unidat i generalidat. Kualke situashon di kalamidat ku presentá Krus Kòrá ta pará kla.
Dia promé di yüni temporada di orkan ta inisiá ofisialmente i Krus Kòrá ta kla pa esei.
Awor mas ku nunka Krus Kòrá Kòrsou tin mester di bo yudansa.
Duna ku un man na Krus Kòrá, un yudansa di kurason
E premionan a bai pa :
Kenzo Koenders – Best Low Net (riba pic e hóben)
Like Korevaar – Runner Up Low Net (riba pic e sra).