Mas ku 10 mion kas na Ukrania a keda sin koriente despues di atake aéreo Ruso

KIEV -Volodimir Zelenski presidente di Ukrania a konfirmá ayera ku e atakenan aéreo brutal di parti forsa aéreo Ruso a pone ku mas ku 10 mion kas awe na vários parti di e pais ta sin koriente.
Ta trata di atakenan aéreo ku a bin ta tuma luga ku regularidat i ku a intensiva den e último dianan.
Rusia ku frekuensia ta ataka puntonan vulnerabel na diferente parti di Ukrania ku avionnan di kombate of dron.
Volodimir Zelenski a splika ku e mishon di e Rusonan ta pa debilitá Ukrania di un forma pa no tin koriente.
Esaki a tuma luga na vários parti di e pais manera na e plantanan di koriente di mas importante di e pais.
Entre otro na Kiev, Odesa, Sumy, Vinnytsia, Kharkiv, Zhytomyr i Lviv ku ta e suidatnan ku avionnan di kombate Ruso a sòru destruí plantanan di koriente i ku awor tin mas ku 10 mion kas sin koriente.
Ta trata aki di un akto terorista konsiderando ku ta hasi hopi friu i ku e hendenan no por sende nan aparato pa tene nan kas kayente debí ku no tin koriente.
Volodimir Zelenski a finalisá indikando ku Vladimir Putin ta un hòmber diabóliko debí ku destruyendo plantanan di koriente teniendo na kuenta ku hopi hende por muri kongelá den nan kas.