“Más claro no canta un gallo….” Kondishonnan Hulandes ta mishi ku e kompetensianan outónomo di Kòrsou

WILLEMSTAD – E forma pa atendé e pandemia di Covid-19 i relatá na esei, e nesesidat di sosten di likides for di Hulanda, na 2020 a kondusí na mas petishon urgente ku normal pa Konseho di Konsulta (Raad van Advies Curaçao, RvAC) trata.
For di e relato anual di 2020 di e kolegio konsultativo mas haltu di pais Kòrsou por dedusí tambe ku elaborashon di algun outoridat di e asina yamá COHO den e (proyektonan di) lei di konsenso di Reino sin mas ta mishi ku outonomia di e gobernashon di Kòrsou.
Te asina leu RvAC ku na fin di 2020 a selebrá su di 10 aniversario.
Na okashon di e echo ku dia 10 di òktober 2020 e Konseho a kompletá dies aña di eksistensia, RvAC a floria su relato di 2020 ku eksperiensia i anékdotanan di èks-miembronan.
Loke ta resaltá den esei ta kon tiki hende sa, hasta ministernan, di e papel i balor di RvAC den promoshon di un estado di derecho demokrátiko ku ta funshoná na òrdu.
Konsehonan independiente di RvAC di un kalidat haltu tambe ta yuda sirbi e meta aki kaminda ta tuma na konsiderashon union, legalidat, legitimidat i kalidat di gobernashon i e interesnan di komunidat.