Martina ta refutá kategorikamente: Gremio empresarial i turistiko ta rabiá i fadá ku maneho di minister

WILLEMSTAD. Miembronan i direktiva di VBC ta fadá i kansá ku e forma ku minister Steven Martina ta manehando nos ekonomia i partikularmente maneho di turismo pasobra nada ta sosodé pa fortifiká nos ekonomia pa bai dilanti.
Esei nan a manifestá ayera durante un enkuentro ku prensa lokal kaminda vise presidente dje organisashon i otronan a ekspresá nan malestar ku e situashon di turismo.
Loke ta pasa i ta stagna turismo ta ku tur kos ta bou di restrikshon i nan tin masha tempu ta lucha pa yuda gobiernu pensa i a ofresé tur sorto di ayudo tékniko pero sektor ofisial a pone tur un banda.
E miembronan di direktiva di VBC ta kere ku nan por duna un kontribushon hopi grandi pasobra ta huntu nos mester yega ne forma mas apropiá pa minimalisá e daño grandi na nos ekonomia.
Pasobra no e pandemia so pero e Lockdown-nan a stroba nos ekonomia interno pa sigi desaroyá.
VBC instansia piloto di ekonomia ta haña e situashon aki inaseptabel pasobra sektor ofisial no ta tuma medida pa fortifiká ekonomia.
Nos pilá mas importante ku ta turismo ta restrikshon so tin i kompará ku paisnan den besindario nos ta keda atras.
Merkado turístiko tin pasobra na Europa miónes di hende ke bai ku fakansi i tin 5000 mion Euro pa fakansi pero ta pone tur sorto di traba i hasta turista mester registrá pa tèst antígeno i pasa den henter un proseso di burokrasia.
Mirando tantu medida asina hende ta kuminsá pensa si realmente gobiernu ke kontribushon di sektor privá i turístiko ounke ku e sekretario general di MEO a hasi su máksimo pa koperá pero loke mester pasa ta ku e minister kita su pidjama bisti bachi kumpra bakuna na preis di kosto i bin bèk i hasi negoshi ku paisnan manera Repúblika Dominikana of Colombia.
Ta paisnan kaminda nan programa di tèst no ta sirbi.
Esaki lo tabata un oportunidat ku nos mester a kue tene pa bende ku paisnan bisiña.
Pero nada ta sosodé asina Reinalt Curiel di VBC a denunsia.
Di parti di CHATA señora Marianela Rojas a splika ku no ta tur hende ta realisá ki efekto katastrofal krisis den turismo i hotel ta kousando.
E ta afektando kompania di aviashon, hotel, hende ku ta alkila outo.
CHATA tin 225 miembro i mester di akshon rápido i konkreto pa suavisá e pandemia ku ta andando ya un aña i mei.
Afortunadamente e tim di kontrol a dominá pandemia pero ningun kompania a pensa ku lo a bin di dos lockdown.
E sektor aki tabatin komo 16.000 empleado i kontribuí ku 40 porshento di ekonomia.
Hotèlnan ta ofresé 4100 kamber i e averahe okupashon di hotel tabata komo 70% i e tarifa diario promedio ta di 150 dòler.
E averahe di okupashon na Kòrsou ta mas haltu den Karibe i nos tabata baiendo hopi komparando un ekonomia no tabata asina bon.
Ora e pandemia a dal aden kantidat di empleado a baha ku 25% i e siguiente konteo a mustra ku ela bolbe baha ku 37%.
E mensahe di Ulanda ku nan a pone Kòrsou riba kódigo hel a duna speransa i positivismo pero reservashon no a drenta manera a spera.
Merkado merikano tambe a habri pero no ta kresiendo manera nos a spera i ta normal ku nan no ta yena mesora pero asina mes e reservashonnan ta kompletamente bou di speransa.