María Corina Machado a presentá ku prueba ku Edmundo Gonzalez a gana elekshon na Venezuela

CARACAS – Ayera aproksimadamente 6:40 di atardi María Corina Machado dirigente di e partido Vente Venezuela a konfirmá ku prueba ku Comando ConVzla ya tin 73,2 % di e aktanan ku ta respaldá e viktoria di Edmundo González Urrutia.
María Corina Machado a splika ku CNE (Consejo Nacional Electoral) ta un organisashon korupto ku ta keda kontrolá pa e régimen di Maduro i ta p’esei no por tin un elekshon presidensial transparente nunka na Venezuela.
Esaki ta nifiká ku e konteo di votonan real ta ku Edmundo González Urrutia a risibí 6.275.182 voto versus Nicolás Maduro 2.759.256.
Lokual ta pasando na Venezuela ta algu históriko debí ku un diktador ku tin respaldo di militarnan i polis ta hasi e situashon muchu mas peligroso.
E situashon ta asina serio ku Nicolas Maduro a laga saka diplomátikonan di Argentina, Chile, Costa Rica, Perú, Panamá, Repúblika Dominikana i Uruguay for di Venezuela simplemente debí ku nan no ta rekonosé komo esun ku a gana elekshon dia 28 di yüli último.
María Corina Machado a finalisá indikando ku e pueblo
a vota pa Edmundo González Urrutia i e lo bira próksimo presidente di Venezuela i Nicolas Maduro tin ku bai..