Manifestashon dilanti ofisina di Banko Sentral awe mainta

WILLEMSTAD – Aliansa Kòrsou Independiente, a organisá un demostrashon onverwagt awe mainta dilanti di edifisio di Banko Sentral. Marlon Regales inisiadó di Aliansa Kòrsou Independiente a bisa NOBO promé ku e manifestashon, ku e grupo chiki ta representá varios organisashon ku ta fadá ku e manera ku Hulanda ta atendé ku Kòrsou.
Ayera nochi e organisashon a kai riba e idea pa organisa e manifestashon. Ela preferá sinembargo pa no manifesta ku un grupo grandi di hende, pa evitá ku ta surgi problema.
Aliansa Kòrsou Independiente a tuma nota di un desayuno ku entre otro VBC tin ku sekretario di estado Van Huffelen, den ouditorio di Banko Sentral. E organisashon a probechá dje momentu aki pa tene e manifestashon pa manda un mensahe klá pa Hulanda i sobrá di mundu: Para e asuntu di COHO. Konstantemente Kòrsou mester bringa un vershon nobo di COHO, sin por yega a un plan di maneho ku struktura i vishon pa nos pais.
Marlon Regales a bisa NOBO, ku Kòrsou ta kansá ku kada bes Hulanda ta presenta medidanan pa Korsou, pa kua Kòrsou mester hustifiká dilanti di Hulanda. E konsekuensia ta ku nunka Kòrsou no ta haña oportunidat pa traha riba un plan maestro.
‘Pasobra konstantemente Kòrsou mester hustifika su mes na Hulanda’.
A yega e momentu pa traha riba independensia di Korsou.No por prolongá esaki mas, tabata e liña kòrá dje ekspreshon di e manifestantenan awe mainta.
Resientemente Marlon Regales a lanta Aliansa Korsou Independiente ku tin komo tarea, inventarisá e diferente ideanan ku tin pa hasi Kòrsou independiente. Regales a splika ku pa hopi tempu, tin diferente persona i organisashon ta boga pa hasi Korsou independiente.
E intenshon ta pa trese e grupo aki huntu pa eksplorá e posibilidatnan pa alkansá e meta.
E resultado final mester ta, segun Regales, un plan maestro ku ta hiba Kòrsou na independensia. Riba e pregunta kuantu tempu esaki lo dura, Regales a bisa ku e ta kalkula ku e ta tuma mas o menos shete aña.