Mama ku ruman di viktima mortal no-intenshonal no ta kobra kompensashon

WILLEMSTAD. Korte di Promé Instansia di Kòrsou no a konsedé un pago pa daño i perwisio pa yu di un señora i su ruman muhé kendenan a pidi un kompensashon di pena di ANG 34.113,54 pe mama i 20.000 florin pe ruman.
E demanda tabata komo kompensashon pa morto di nan yu/ruman di 19 aña den kurá di nan wela Promé dia di Pasku di Nasementu aña pasá aki na Kòrsou.
E hoben ku a sufri un morto no-intenshonal na man di su amigu ku tabata biba na Ulanda i for di mucha e tabata amigu intimo ku e viktima.
Ministerio Publiko a akusé di morto kulposo kombina ku poseshon ilegal di arma di kandela.
Abogado dje akusado tabata señora G.C.A. Scheperboer-Parris, Dia 20 di aprel korte penal a trata e kaso kaminda mama dje viktima i su ruman muhé a registrá nan mes komo partsisipante pa hasi un demanda di kompensashon.
Fiskal B. Niks a anunsiá ku pa OM e hoben ku a komete e asesinato no-intensonal lo keda kondené komo tal i pidi un kastigu di 30 luna di kual 10 luna kondishonal kitando e tempu ku ela pasa den aresto preventivo.
Fiskal a dekará e demanda di kompensashon komo no atmisibel pasobra den un kaso penal asina OM no sa pidi pago di kompensashon.
Loke a pasa e dia ei ta ku e akusado a bai duna show den kurá di kas dje wela ku e arma di kandela i a aktivá e arma i e bala a dal den kabes dje viktima kende a muri mesora.
Tantu Fiskal komo wes tabata di akuerdo ku no ta un kaso di asesinato premeditá.
Pero e abogado kier a bai mas leu i pidi pa apsolvé su kliente di morto kulposo.
Korte a konstata ku e dia ei e viktima a bai kas di su wela ku e arma pa mustra e akusado pero ora e kier a pasa e arma ne sospechoso e viktima no a paga tinu i a purba fangu e arma na mesun tempu ku e tabata manipula ku su telefon.
Ta durante e manipulashon aki e arma a kai i su dede a pega den e gai i e tiru a sali matando e viktima mesora ora ambos a purba fangu e arma.

DIFERENTE
TESTIGU
NINGUN A
MIRA NADA
Fiskal a interogá tur testigu pero ningun a mira e insidente.
Tur a deklará ku e dosnan tabata bon amigu foi tempu nan tabatin 8 aña.
Loke por akusá esun ku a tira kontra su boluntat ta ku ela aktua kompletamente iresponsabel.
Pa bisa e kos manera ta: ela muri na man di un impakto di bala di su propio arma ku tabata kargá i kla pa tira.
No tin duda ku ela muri na man di su mes arma.
Un opservashon ku e wes a hasi ta ku e no a menshoná e pais kaminda e suseso a tuma lugá,pero ku tur hende por saka nan sòm ku ta na Kòrsou.
E relato polisial ta menshona ora nan a yega na kas dje wela nan a mira un hende na suela i un persona femenino ku tabata presente a bisa ku e viktima ta biba na Hulanda.
E sentensia di wes tabata 18 luna presu di kual 6 ta kondishonal i kitando e tempu ku ela pasa será kaba.