Luigino Winklaar so ta keda prizon

WILLEMSTAD – Ayera tabatin tratamentu di e kaso di e trio Rodshendell Martina (21 aña di edat), Luigeno Winklaar 21 aña di edat i Luigino Winklaar di 24 aña di edat, kendenan a keda akusá di atrako kometé dia 4 di òktober 2022 na Kadushi Bieu Snack, hòrtando kadenanan di oro i stainless steal, oloshi marka Invicta i renchi di oro, armbant, pòtmòni, sumanan di plaka na rason di 600 florin, 25 dòler merikano, mas suma di plaka, telefon mobil, un outo Kia Rio, kadena di hende muhé, yabinan di 1 outo Kia Picanto, un pòtmòni ku ta kontené 765 florin, oloshi di oro marka Casio i 1 telefon mobil kolo di oro.
Esaki a sosodé na Kadushi Bieu Snack na Seru Fortunaweg. E víktimanan tabata na Snack hungando dominó, miéntras e grupo di atrakadornan a yega na e sitio obligá e hungadónan di dominó pa entregá nan pertinensianan, menasando ku arma di kandela, siendo e atrakadónan tabata ku karanan tapá. Polis a keda yamá na e sitio, kaminda mesora a kore pasa na vários sitio. Na sierto momento a kore para na un trùk di pan, aki e akusado Luigeno a komportá masha sospechoso mes i polisnan a gar’é, siendo un outo a start kore bai lag’é patras. A sigui tras di e outo den kua Rodshendell Martina i Luigino Winklaar tabata. E akusado Rodshendell Martina (shofùr) a logra baha for di e outo i kore bai, miéntras Luigino Winklaar a keda den e outo. Den sala di korte e akusadonan a splika ku polis a tira dirigi riba e outo i ta p’esei nan a spanta. E motibu di a komportá sospechoso ora ku nan a mira polis tabata pa motibu nan tabatin droga huntu ku nan. Tambe e trio a keda akusá di poseshon di arma di kandela.
Redondamente e trio a ninga ku nan tabatin algu di haber ku e atrako na e Snack. Sinembargo Luigino Winklaar, kende no tin masha tempu ku el a kaba di rekobrá su libertat, klaramente ta envolví di un otro atrako mas, esta esun na Playa Úniko, kometé dia 2 di òktober 2022, hòrtando rugtas, kadena di oro, armbant di oro, telefon mobil (Samsung A51), brel di solo, telefon Iphone, etcetera.
Aki tambe e atrakadornan a hasi uzo di arma di kandela. A haña parti di e merkansianan hòrtá na Playa Úniko, den e flèt kaminda Luigino Winklaar a keda. Fiskal señora mr. S. Polderman a demandá un kastigu di prizon di 5 aña pa Luigeno Winklaar i Rodshendell Martina, anto pa Luigino Winklaar un kastigu di prizon di 7 aña. Abogadonan señora mr.
A Perigault Monte i señor mr. Humphrey van Blarcum a para ariba ku nan klientenan ta inosente.
Pero mr. S. Larmonie tabata den un situashon di defensa mas kompliká, pasobra a haña pruebanan kontra di Luigino Winklaar den kaso di e atrako na Playa Úniko. Finalmente wes a konkluí ku Luigeno Winklaar i Rodshendell Martina por sali liber numa pa falta di sufisiente prueba, siendo Luigino Winklaar mester sinta un kastigu di prizon di 4 aña.
A haña vários di e ophetonan ku a keda hòrtá na Playa Úniko i ku e doñonan a rekonosé komo nan propiedat.