Liga Soraida Juliana ta klousura: Temporada 2022 i ta inisiá training di pre selekshon Junior i Senior League

WILLEMSTAD (C) – Despues ku Liga Soraida Juliana a hunga softball riba kasi tur e vèltnan na Kòrsou, di Soto te vèlt Ricardo Elhage na Sta. Rosa, di Post 6 pa Buenavista, di Domi, Frank Curiel i Sam Bunting ball park na Brievengat, den e wikènt di 6 i 7 mei ku a pasa, ekiponan pertenesiendo na Liga Soraida Juliana den e kategoria Minor, Little, Junior i Senior,a hunga nan delaster weganan.
Un bon públiko a akudí na Post 6 pa a mira e ekiponan kumpli ku e mínimo di 12 wega ku mester kumpli ku ne, pe Liga su divishonnan ta eligibel pa partisipá den e regional Latino Merikano ku lo tuma luga den luna di Yüli.
Puerto Rico lo ta pais anfitrion.
Na 2019 Kòrsou a titulá kampeon Latino Merikano divishon Junior. E titulo kampeonil a hiba Kòrsou ne mundial di Williamsport Little League softball fast pitch femenino. E pandemia a stroba ku na 2019 i 2020, Kòrsou por a biaha i defendé su titulo kampeonil Latino America. Awor ku a suavisá medidanan dirigí riba prevenshon di kontagio di Covid, Puerto Rico a buta su mes disponibel pa organisá e regional na nivel di Junior i Senior.
Liga Soriada Juliana a apuntá un komishon konisistiendo di sr. Bryan Goilo Vise presidente di CLLS i sra. Isonette Polonius ku na nòmber di direktiva, a skrutina empeño di e muchanan i forma e pre selekshon. A apuntá e team tékniko i ya e training di e pre selekshon a kuminsá.
Direktiva di CLLS ta gradisí spònsernan ku a hasi e kampeonato 2022 posibel. I Awor aki ta aserkando spònsernan atrobe pa yuda ku gastu mara na saka e selekshon. Si akaso un kompania ke yuda,nan por tuma kontakto ku sra Manuela na number di cell 5296345