Lei di polushon di airu ta klá den dos luna

WILLEMSTAD – E lei di polushon di airu ku gobiernu ta traha riba dje, lo ta kla denter di dos luna. Esaki ta un dje partisipashonnan ku e sindikatonan ku ta representa trahadonan di refineria, a hana durante reunion ku gobiernu den fin di siman.
E reunion tabata pa duna kontesta na e sindiktonan riba preguntanan ku a surgi despues ku siman pasa Fundashon Clean Air huntu ku un grupo di habitante a gana kontra di gobiernu, relashona ku polushon di airu di refineria.Hues a dikta den e sentensia ku e lei kontra di polushon di airu di Korsou – ku ainda no ta kla-, mester kuadra ku e normanan di e Organisashon Mundial di Salú.
Gobièrnu a antisipa veredikto aki. ‘Nos sa ku nos ta den default ku pais semper.’ Sinembargo e sindikatonan no mester preokupa pasobra e direktor di RDK a splika nan ku e proseso di negosashon ta sigi normal. Den e preparashonnan ku tin, a tene kuenta ku mester baha e norma di polushon. No tin ningun motibu pa tin paniko of pensa ku e refineria no ta bai habri.
Minister Sithree van Heydoorn a splika ku e sindikatonan a keda satisfecho ku e informashonnan ku nan a risibi. Segun minister van Heydoorn, e lei ku mester ta kla, ta un lei ku ta kubri no solamente refineria, pero hopi mas tantu kos. Pasobra e parti di refineria aworaki ta relashona ku e polushon ku ta bai den airu. Pero e lei ta relashona tambe ku entre otro polushon den tera. E ta un lei asina grandi, e minister ta splika, ku tin 14 aña ku ta trahando riba dje. Ya a saka for dje lei, e parti ku ta regarda Refineria. A traha un lei mas chiki. Esei ta hasi posibel pa e proseso por kontinua.
Minister van Heydoorn a bisa ku awe e ta reuni ku RDK i GMN di kua e último aki ta esun ku ta enkarga pa e lei ta kla. E minister a pidi tambe RDK , pa mirando e situashon finansiero di gobièrnu ku hopi bia no ta kritiko, pero ta dura largu promé ku por saka sèn, pa yuda.
Van Heydoorn a pidi RDK, pa e paga profeshonalnan eksterno ku tin mester , por ehempel wetgeving juristen, pa yuda den e proseso aki. ‘’Den un termino di dos luna, nos tin e lei kla’’. Minister van Heydoorn ta bisa ku en espera di regreso di prome minister Gilmar Pisas, e ta kontinua ku e trabounan aki.
Definitivamente gobièrnu ta bai hasi tur loke ta nos alkanse pa refineria habri bè tan pronto posibel.’’ Segun e mandatario, gobièrnu tin e espasio pa keda kla ku lei, pasobra ora ku refineria habri, esei no ta nifika ku mesora ta kuminsa ku produkshon. Ta e intenshon pa start ku renobashon i mantenshon di e plantanan, ku ta tambe ta tuma tempu.