LABdeMED a tene simposio: Tema kompliká pero masha importante pa trata i evitá malesanan vaginal

Willemstad- Durante un simposio organisá pa LABdeMED, ekspertonan for di Hulanda i Merka a kompartí nan konosementu ku dòkternan i speshalistanan médiko tokante e ròl di mikro organismo den desaroyo di malesanan ginekológiko.
Médikonan di Kòrsou, Aruba, Boneiru i Sint Maarten a partisipá na e simposio aki. E simposio a kubri varios aspekto di mikrobio ku ta frekuentá den e vágina. Esaki ta e di dos simposio ku LABdeMED ta organisá p’asina kontribuí na konosementu di nos médikonan riba diferente tópiko di interes i tambe elevá nos nivel di kuido en general.
E biaha aki a pone atenshon na e tópiko di patologia, “E ròl di mikro organismo den desaroyo di malesanan ginekológiko”. E oradónan, kada un for di un otro ángulo, a ilustrá aspektonan di mikrobionan den e vágina. Esnan presente a haña un bista mas profundo di e ròl ku mikro organismonan (bakteria, viro, skemel i parasit) tin den krea malesa den e organo di e hende muhé. Normalmente e kurpa humano tin 1.5 kilo di mikro organismo ku ta yuda nos keda salú, basta e totalidat di e mikro organismonan aki tin un bon komposishon.
Gran mayoria di e mikro organismonan aki ta den nos tripa. Otronan ta riba nos kueru òf otro partinan ku ta konektá ku nos interior manera via di e vágina. E komposishon di e mikro organismonan huntu por ta origen di diferente malesa den e organo seksual di e hende muhé, manera algun tipo di infekshon, pero tambe algun forma di kanser, outo imunidat i algun forma di infertilidat. Durante e simposio a elaborá riba e manera korekto i trempan pa buska komposishon di mikro organismonan robes (i ku ta kousa malesa) tambe , i tambe a diskuti e diferente forma di trata e malesanan aki di e organo seksual di e hende muhé i asta prevení esakinan.