Kurpa i Sanger di Kristu

Promé Lektura : Éksodo 24, 3-8
Salmo : Salmo 116, 12-13, 15-16, 17-18
Di dos Lektura : Hebreonan 9, 11-15
Evangelio : Marko 14, 12-16, 22-26

Tabatin un mucha hòmber ku semper tabata yega kas lat ora e sali skol. Konseho i skualmentu no surgi ningun efekto. Finalmente, un dia, su tata a hal’é na òrdu i a bis’é: “e próksimo bia ku bo yega lat, lo bo kome pan ku awa. Esaki ta kla p’abo?” E yu a komprond’é perfektamente.
Algun dia despues e mucha e yega kas mas lat ku nunka. Su mayornan no a bis’é nada. Ora nan a sinta pa kome el a mira ku tayó di su mayornan tabata yen i riba di dje tabatin únikamente un pida pan i un glas di awa. El a mira e pan i despues e awa. E tata a warda un ratu p’asina e yu laga e kastigu penetrá. Despues el a tuma e tayó di e yu i a pone su dilanti. El a kohe su tayó i a pone dilanti di e yu i nan a kuminsá kome.
Hopi aña despues, e mesun mucha hòmber rekordando e episodio aki di su bida a komentá: “Hinter mi bida mi tabata sa kon Dios ta pa medio di loke mi tata a hasi e anochi ei”.
Bunita lès kaminda ku e tata ta tuma pa su mes e kastigu ku su yu a meresé. Un lès sin palabra. Un lès relashoná ku Dios ku e yu hòmber nunka a lubidá.
Hesus, manera e Tata den e historia, kada djadumingu ta kohe nos tayó bashí i ta ofresé nos un tayó yen yen di amor i pordon i ta bisa nos: “Tuma i kome, esaki ta mi kurpa.” Riba djadumingu Hesukristu ta multipliká e pan pa su yunan.
Promé nos ta skucha Hesus pa mira nos débil, desobediente i ku nesesidat di sanashon. Nos ku ta biba den un mundu ku a hinka Dios den huki, nos tin ku eksperensiá su presensia, su poder i su amor. Dios ta satisfasé nos hamber ku e pan di bida.
“Hesus tabata papia ku e hendenan di e Reino di Dios”.
Promé e Palabra, e Bon Notisia, e Reino di Dios; promé e ta duna nos di konosé ku nos ta yamá pa forma parti di un órden nobo di kos. Hesus ke mustra nos mundu i nos bida tal manera su tata ta mir’é.
I e Palabra di Dios, riba e dia di fiesta akí, ta pasa pa nos algu diario i nesesario manera e pan i biña ta.
Hesus, e mihó predikadó, ke pa nos keda kuné, ku nos ta kompañ’é den e bankete ku E ta prepará pa nos riba kada djadumingu. E ke pone dilanti di kada un di nos un tayó di kuminda pa e biahe di bida. I E ta manda nos: “Hasi esaki na mi memoria”.
Den kada Eukaristia, e saserdote ta pronunsiá e mesun palabranan ku Hesus a pronunsiá na e Último Sena. Palabra ku nos mester skucha komo e gran regalo ku Dios ta duna nos.
Nos ta aserka altá pa risibí kurpa i sanger di Kristu pa hasi nos UN kuné. Nos ta digno? Klaro ku nò. Pero si nos spera di ta digno nunka nos lo yega serka. Pero nos ta hasié ku konfiansa pasobra E ta kombidá nos.
Nos ku sakramentalmente ta kome e Kurpa i ta bebe e Sanger di Kristu ta kombèrtí nos mes den e kurpa bibu, visibel, real di Kristu pa mundu.
Nos ta kombèrtí nos mes den su presensia real, nos ta e tayó yen di e amor i pordon di Dios ku Hesukristu ke pone dilanti di tantu ruman di nos ku nunka lo mira otro tayó.
Nos ta yamá pa kombèrtí nos mes den loke nos ta, e kurpa di Kristu. Amèn