Kurpa di Kristu ta den misa? Den kua sentido?

Cinto Busquet
Kristu Resusitá ta bira realmente presente pa nos kada be ku ta selebrá Eukaristia, kon bo ta keda?
Den parokianan ta tempu di promé Santa Komunion. Famianan di e muchanan di katisashi, ku a prepará nan mes mas o ménos bon pa risibí Eukaristia, ta yena nos iglesianan.
Hopi di nan pa basta tempu no a partisipá na un misa i pa algun di nan inkluso ta e promé be ku nan ta hasié.
Nan ta buya fásilmente si no ta pone atenshon na nan i nan ta mas pendiente di e potrètnan i pañanan ku no di loke ta bisa òf di loke ta hasi.
I mei mei di un inkapasidat generalisá pa kapta profundidat di signonan, noa ta bolbe ripití loke Hesus hasi den e último sena, ora, partiendo pan i kompartiendo e kopa di biña. E tabata ke laga su disípulonan komprendé ku El a bini na mundu no pa imponé su mes ni pa kondená, sino pa duna su mes p’asina ku nos tur lo tin bida den abundansia.
Kurpa i sanger
Kristiannan, apesar di distinto splikashon ku nos por duna di dje segun e teologia sakramental di nos respektivo iglesianan, ta konsiderá pan i biña konsagrá durante e liturgia eukarístiko “e kurpa i sanger di Kristu”.
Tradishon katóliko, for di edat medio lat, a suprayá di forma insistente e presensia real di Kristu den e partinan eukarístiko.
Sin embargo, mirando e poko rekohementu interior i e ansha ku hopi be ta kompañá e momento di komunion di e katólikonan praktikante mes , un opservador eksterno lo por yega na e konklushon di ku nos no ta kaba di kere tur kos, esta di ku Kristu Resusitá bira realmente presente pa nos kada be ku nos ta selebrá Eukaristia.
Fiesta di Corpus ta invitá nos na kontemplá i na asumí mas konsientemente e realidat di e sakramento di Kurpa i Sanger di Kristu.
«Tuma boso tur kome. Pasobra esaki ta Mi kurpa ku lo ta entregá pa boso».
Un regalo material
Hesus no ta duna nos i no ta laga pa nos na promé lugá un doktrina. E ta duna su mes totalmente. E tei den e kurpa. E ta duna nos su kurpa.
Nan no ta bon intenshonnan. E ta un don di henter su mes den e materialidat di su kurpa, p’asina ku nos kurpa por akohé e Spiritu di kua henter su kurpa ta yen.
I asina tambe kombertí nos, huntu manera un komunidat uní den su nòmber i tambe kada un di nos, den manifestashon real di e presensia di Dios den mundu, kurpa di Kristu ku ta kontinuá dunando su mes na e humanidat di awe.
Kere den e presensia real di Kristu den Eukaristia i kompartí e pan ku E mes ta kontinuá konsakrando pa nos, ta enserá komprometé nos pa transformashon di e realidat.
No simplemente proponiendo proyektonan òf luchando pa kousanan noble, sino prinsipalmente laga nos ser transformá interiormente pa Esun ku ta bishitá nos.
Di manera ku nos mes, kombertí den kargadónan den kurpa di su Spiritu renobadó, nos por ta realmente agentenan di transformashon positivo di mundu for di su interior.
Eukaristia: E núkleo di e fe kristian
No por redusí Eukaristia na un deboshon katóliko mas. Den konsagrashon i den komunion di e partinan eukarístiko ta konsentrá, simbólikamente pero alabes realmente, e núkleo di e fe kristian: Dios den persona di Hesus a drenta plenamente den e historia humano pa keda. I mustra bo mes komo amor ku ta ser duná i risibí:
« Si boso stima otro, tur hende lo sa ku boso ta mi disipel.» Huan, 13, 35

Únikamente si nos stima otro realmente e ora ei nos ta manera kristiannan kreibel. Pasobra Hesus ta e Yu stimá dor di Tata; Manera Tata a manda Mi, asina Ami ta manda boso (cf. Huan 20,21).
Dor di Eukaristia E ta uni nos na djE i entre nos, E ta introdusí nos den e kurason di Tata, E ta komuniká nos ku Spiritu Santu i ta manda nos pa manifestá i fortalesé den tur parti e dinámiko trinitaria di amor ku ta renobá tur kos.