Kuminsando aki 5 luna….. Azul ta anunsia buelo for di Brazil un biaha pa siman

WILLEMSTAD – Ofisina di Turismo di Kòrsou (CTB) a anunsiá ku e kompania di aviashon Azul prosedente di Brazil lo inisiá ku un buelo semanal direkto pa Kòrsou entrante 24 di yüni próksimo.
Azul ta e aerolínea di mas grandi di Brazil den kantidat di ruta i destinashonnan ku e aerolínea ta sirbi ku un kantidat di mas di 900 buelo diario pa mas di 150 destinashon.
E buelo pa Kòrsou lo inisiá for di BH Airport na e siudat Belo Horizonte den e estado di Minas Gerais.
E buelo nobo ta bini komo resultado di un demanda kresiente for di e merkado di Brazil.
Varios instansia aktivo den turismo a duna nan kolaborashon.
E buelo lo ta riba djasabra saliendo Brazil mainta i e buelo di regreso lo sali Kòrsou riba djadumingu.
Brazil ta un merkado kresiente pa Kòrsou i e konekshon nobo aki ta unu importante pa sigui krese e merkado.
Fuentenan ofisial ta kalifika e desishon pa a keda aktivo den e merkado di Brazil komo un bon desishon i nan ta spera ku e buelo direkto lo duna un resultado positivo for di e merkado di Brazil.
Kon e buelo ta kontribui na mas konekshon di biahe pa nos pueblo lokal nos no ta mira pasobra e buelo no ta konektá ku paisnan den nòrt pa kual tin sufisiente abundansia di vuelo kaba.
Mas sur di Brasil tin e destinonan Uruguay, Paraguay i Argentina ku kual Kòrsou tin masha poko konektividat.
CTB ta kontentu ku e ruta aki ku lo trese mas turista pa bin eksperensiá e produkto úniko ku Kòrsou tin pa ofresé.
Fundador dje kompania ta David Neelemann