Kuminsa konsientisá i eduká hobennan riba peliger di adikshon di wega di video

Willemstad – E parlamentario Juniel Carolina e siman aki a pidi atenshon di su koleganan di partido ministernan Janga i Van Heydoorn riba e peliger di adikshon di hubentut ku wega elektroniko di video.
Den aktualidat, nos ta nota ku e mayoria kasnan na Kòrsou tin alomenos un konsole of un rèki o un mobilaro di muraya ku ekipo Nintendo, Playa Station i XBOX.
i no mester pèrdè for di bista ku a bin aserka ya pa algun aña kaba, tur e sorto di telefònnan super sofistiká (smart Phone) ku kasi tur mucha, hóben i adulto tin den propiedat.
Ora nos para ketu na e tema aki i wak ta dikon nos ta gusta e weganan di video aki, ta bisa den e proklamashon ku weganan di video a wòrdu kombertí den un forma di bida i ku e teknologianan nobo, e merkado di e weganan di video a ekspandé aún mas.
Netamente ku nos ta mira ku e adikshon na e weganan di video, a ekspandé aún mas sin para ketu riba e parti negativo ku e weganan di video por trese kuné tantu pa akto kriminal i tambe pa ku nos salú.
Por tuma nota kuantu hóben den nan pleno hubentut ta mata hende rònt mundu muy prinsipal na Merka.
Pasobra nan ta venená dor di e weganan di video for di chikí.
Banda di esaki e ta pone nan lubidá, nan ta bira agresivo, depreshon, edukashon na skol ta bai atras i ta kosnan ku a proba kaba.
Señora presidente ami ta di opinion ku aki na Kòrsou nos mester kuminsá konsientisá nos muchanan for di na kas i skol den nan formashon riba e parti negativo ku wega nan di video por trese kuné di e adikshon haltu riba e weganan di video i asina nos tin mucha i hóbennan sano salú i sigur muy prinsipal pa loke ta nan mente i aki mi ta wak den direkshon di nos minister di Salubridat i mi ta kere huntu ku su kolega minister di enseñansa Van Heydoorn pa wak kon nos por kontra arestá e adikshon ku tin bou di weganan di video aki na Kòrsou ku nos ta na altura ku esaki di bèrdat ta kresiendo na Kòrsou, muy prinsipal bou di mucha i hóbennan.