Kua ta plan di gobièrnu pa dil ku oumento di preisnan mundial?

WILLEMSTAD. E parlamentario Sheldry Osepa di Partido Nashonal a manda un pregunta kardinal manera un kañon den direkshon di promé minister Pik Pisas e siman aki.
E siman akí e banko mas grandi di Kòrsou a anunsiá ku nan lo oumentá tarifa di luna pa mantene un kuenta serka nan.
E preis lo subi di Naf. 3,71 pa Naf. 5,30. Pa funshoná awendia den un komunidat sivilisá un kuenta di banko ta indespensabel.
Komunidat di e forma akí ta sinti ku a drenta den su saku, sin ku e komunidat por bisa nada.
Esaki, despues ku ya kaba preisnan tur kaminda ta subiendo. Si nos sigui e desaroyo mundial nos ta mira ku internashonalmente balor di euro ta alkansando balor di dòler.
Diferente di nos ekspertonan finansiero monetario i tambe kuerpo di representantenan di dunadonan di trabou, ta mustrando riba e konsekuensia negativo di esaki.
Den e totalidat mester konsidera tambe e oumento di preis di gasolin tur luna sin ku niun di nos por bisa te na unda esaki lo yega.
Tambe no mester lubidá e preis di kuminda ku a subi di un forma indiskriminá. E desaroyo aktual meresé atenshon.
Porta e desaroyo akí meresé asta un maneho dirigí, mirando nos estado di “small developing country”.
Den tur esaki e parlamentario ta sinti falta di informashon kolektivo na pueblo tokante nos estado komo pais i tambe preparashon kon pa 2 atendé ku difikultatnan grandi ku ta nos dilanti.
Segun preisnan ta subiendo i tur komersiante ta keda pone e oumento riba pueblo, e situashon ta bira insostenibel.
E kandidat di pèrsona ku ta aserkando Osepa pa ayudo diariamente ta keda subi.
Miéntras ya kaba tabatin un grupo grandi den nesesidat.
Sin lubida su karta fechá 10 mei 2022 den kua ela mustra riba e kantidat di hende ku ta bayendo for di Kòrsou. Riba e karta ei no a bini kontesta ainda pero Osepa ke hasi Pisas e siguiente preguntanan:
1. Kiko ta e plan di gobièrnu pa dil ku e krisis di oumento di preis ku ta biniendo riba Kòrsou?
2. Kon gobièrnu tin pensá di dil ku famianan mas swak relashoná ku e krisis akí?
3. Kiko ta e plan di gobièrnu pa eksonorá esnan mas debil den e komunidat for di aumento di preis?
4. Gobièrnu ta pensando riba un maneho kreativo pa mantene preis di kuminda abou?
5. Gobièrnu tin un forma pa soru ku durante e krisis akí mucha di famianan menos previlegiá por risibí kuminda?
6. Kiko ta e esfuersonan ku gobièrnu ta hasiendo pa sigui mantené òf baha kosto di bida?
7. Gobièrnu tin un vishon di maneho pa kon pueblo di Kòrsou por pasa e krisis mundial relashoná ku e guera entre Rusia i Ukraina?
Gustosamente Osepa ke risibí kontesta riba e preguntanan akí e por sigui atende e tópiko akí.
Osepa ta spera riba un kontesta rapido.