Ku PAR den oposishon Parlamento mayoria di “Ja-Knikker” a yega final

WILLEMSTAD. Awe mainta e parlamento den su aktual a tene konstelashon a kanta su “Zwanezang” pa dje forma aki krea espasio pa e parlamento den  su konstelashon nobo por tuma asiento pa e proksimo periodo di 4 aña òf por  lo menos te dia ku e koalishon dura pasobra koalishonnan ku a dura 4 aña a bira eksepshon den nos pais.

Kara dje parlamento nobo lo ta radikalmente diferente ku e partido ku tabata na volante ku bandera di PAR awor lo ta den ‘back seat’ den banki di oposishon.

E reunion final dje parlamento aki a tuma lugá den salanan di PWFC pasobra pa straño ku por parse, a renobá parlamento pa masha mion pero e no ta funshonal…..

Un parlamentario saliente ku seguramente pueblo tabata interesá pa skucha su diskurso di despedida tabata Menki Rojer kende awe mainta a tuma despedida komo miembro dje parlamento den kual ela fungi komo 2016 te 2021 indikando ku debí ku ela atravesá politika pa hopi aña, kuantu tabata konsiente kiko ta notifika politika.

Ela rekonose ku no por spera konosementu perfekto for di inisio di nan mishon i karera

mesora pero tampoko a mira nivel parlamentario manera tabatin den pasado.

Ela referi spesifikamente na e lei di screening i ta puntra kon un parlamento den un pais demokratiko ku banda di dje tin un otro organismo ta determina ken ta bira minister den e pais aki por permiti esaki.

E ta un lei anti demokratiko pasobra esun ku tin  ultimo palabra pa nombra minister, ta parlamento di Korsou.

Menki  hasi un yamada dramatiko riba e parlamentarionan nobo pa elimina e lei di screening pasobra no por t’asina ku e ta kòrta den bo mes karni.

Awor t’asina ku e parlamentario ta mina ultimo palabra di parlamentario pa gruponan ku no tin nada di haber ku politika.

I si Ulanda bisa bo ku e ta kontra pa elimina lei di screening, bisa nan introdusi nan mes na lei di screening i nos ta somete na dje.

Por lo demas ela pasa momentonan di hilaridat pero tambe di tristesa pero serando ela hari poko tòg ora nan a bisa ku e gabinete aki tabata e mihó gabinete ku Korsou a konosé.

E tabatin gradisimentu pa tur kolega ku ela traha kune pasobra e no tin enemigu den parlamento pasobra nan tur ta den mesun wega.

Na su turno e parlamentario ku awe a kuminsa su segunda tanda di 4 aña komo parlamentario, Calmes awe mainta apesar di tur e turbulensianan rondó di su persona a splika ku awe e ta selebra pasobra e parlamento di mas debil den historia di Korsou ta bai kas.

Hamas e por a pensa dia e tabata chikitu e mester a bin defendé demokrasia den parlamento pero danki Dios e tabatei pa por a defende demokrasia.

Ta den e parlamento aki e mester lucha kontra Lei di Eksepshon, lei ku kier a drenta kas di hende i asina mes militar ta plama rònt Korsou te ku ta buska telefon di e hende.

Ta e parlamento aki mester a para pa libertat di prensa i no mas ku awe tabatin kuestion di kita telefon pa drenta sala di Asamblea ku gobiernu a organisa.

Ela splika ku ta  tempu di e diktador di Spaña, Generalisimo Franco e kosnan aki tabata sosodé.

I papiando di demokrasia, ta na  2012 na Egipto numa hende a haña chèns pa bai elekshon despues di a lanta kontra régimen.

Pero e parlamento i gobiernu aki kier a lubida Doktoor i Jonckheer i kier a bin ku Lei Marsial pero ta den parlamento a midi demokrasia.

Papiando di su mes trayektorio den parlamento, no  ta un sekreto ku e tabata forma parti dje gobiernu aktual i a kita su sosten i dje partido pasobra e lo sigi para den e sala pa bienestar di pueblo kontra tur ku ke kumpra hende i voto pero e tei pa kumpli ku derecho i deber.

Ta na su lugá pa e parlamentarionan nobo haña sufisiente informashon pasobra ta hende nan ta i ela mira parlamentario sukumbi.

Desishonnan ku mester tuma ta tòf i nan no ta robòt pero no mester lubidá ku nan a  hura.

E pais aki mester di hende ku tin prinsipio i dignidat i ku por kana den bario sin miedu.

E ta kontentu ku den e parlamento ku ta drenta, tin hopi kara nobo ku por ta habri pa mira demokrasia manera e mester ta.

Tambe ela rekordá tur kolega ku no mester di ta Ja-knikker di ningun gobiernu.

Jacinta Constancia na su turno a yama danki pe trayekto ku pueblo di Korsou a pèrmitié okupá for di 2002 pa e por tabata den parlamento i tambe komo mandatario.

I papiando di sirbi, ela rekordá kaminda monseñor Römer tur djadumingu mainta tabata hiba e palabra spiritual enfatisando ku e hende mester ta importante.