Kristu a bini pa salba tur hende

Promesanan di Dios no ta ekskluí ningun hende. Santa Skritura ta bisa nos bon kla: “Dios ke pa tur hende haña salbashon i yega na konosementu di e bèrdat” (1 Timoteo 2,4).

Den esaki tabatin, presisamente, e kibokashon di hopi hudiu, ku a pensa, eróneamente, ku e Mesias tabata únikamente pa nan. Pero, manera Pablo ta bisa, “Ta ún Dios so tin i ún Mediador entre Dios i nos, esta e hende, Kristu-Hesus” (1 Timoteo 2,5).

Ora Dios a skohe Abraham p’asina ku e tabata e kabes di un pueblo nobo ku lo a konos’é i sirbié komo su úniko Señor, E a laga na komprendé klaramente ku de futuro otro pueblonan tambe lo drenta pa forma parti di su desendensia.

Esaki ta loke e apòstelnan a trata di laga nan rumannan di rasa mira, aunke a kosta hopi trabou pa kambia un mentalidat di siglonan. Nan, en bèrdat,  risibí di Señor e seguridat di ku e Evangelio tabata pa tur hende, sin distinshon di rasa, pues mester a prediká e salbashon te den e último skinanan di tera.

E hudiunan promé

E práktika normal tabata di hiba e mensahe evangéliko, na promé lugá, na nan rumannan israelita. Asina nos por mir’é den Echonan di Apòstelnan. Pero e gran mayoria di hudiunan a rechasá  de plano Hesus komo Mesias i a yega e momento den kua nan a ekspulsá e kristiannan di e snoanan i a prohibí nan sigui konsiderando nan miembronan di nan komunidat.

Esaki, en bèrdat, no a afektá e disípulonan di Hesus hopi, pues si nan tabata mantené nan mes partisipando na e aktividatnan di e pueblo hudiu, tabata pasobra nan a kere sinseramente ku Iglesia a bini pa ta e prolongashon, den historia, di hudaismo komo religion, i e último lugá di warda di e promesanan hasí na Abraham.

Dor di ku mester a kibra ku  e hudiunan, e kristiannan a hasié lamentando nan frakaso den kombensé nan di ku Hesus e profesianan mesianiko lo a ser kumpli den Hesus i di ku E tabata e Úniko ku por a spera.

Klaro ku tabatin hudiunan ku a bira kristian, pero, en total, nan no a laga di ta un minoria entre e miembronan di e Pueblo Elegí.

No ta tur a komprendé igual

Algu ku ta yama e atenshon ta ku, for di e promé tempunan, tabatin esnan ku no a komprendé e mensahe kristian manera e otronan i, pa mesun kos, a apartá nan mes di e prinsipal di Iglesia, kreando ku esaki separashon i sektarismo.

E dato akí ta importante, pues e ta laga nos mira ku desunion entre e disípulonan no ta algu moderno, sino un fenómeno ku kua ya e propio apòstelnan mester a lucha.

Komo ehemplo laga nos mira e palabranan aki di apòstel san Pedro den su di dos Karta: “Pero meskos ku tabatin profeta falsu den pueblo di Israel, asina tambe maestro falsu lo lanta entre boso. Pushi pushi nan lo laga siñansa ku ta destruí bida di hende infiltrá meimei di boso; nan lo nenga nan Doño ku a paga pa nan sali liber i asina lo aselerá nan propio destrukshon” (2Pedro, 2,1).

Esaki a demostrá ku nos ta sernan humano i ku ta nos resultá mashá difísil pone nos di akuerdo hasta ku kosnan di Dios. Ta pesei nos awe nos ta sigui mirando e teribel skandal akí ku ta, no únikamente desunion, sino hasta  konfrontamentu ku esnan ku nos ta konsiderá disípulonan di Kristu, tin be ku mas rabia ku si nos mester tabata den konflikto ku diabel mes.

Un solo iglesia

Asina manera Kristu ta un so, di mesun manera Iglesia ku El a funda ta UN. Un Iglesia, esaki sí, santu i pekador, pues ta trata di e konhunto di tur esnan ku a ser resusitá pa Kristu i a renasé na e bida nobo dor di Boutismo.

No laga nos lubidá ku si Boutismo ta hasi nos yunan di Dios i ta duna nos su grasia, no pa esaki nos ta stòp di ta pekador, pues miéntras nos no yega na shelu, nos lo mester lucha kontra e tendensianan di piká ku ta trata na dominá nos.

Ta pesei den e dos mil añanan di su historia, Iglesia a bai ta superando hopi opstákulo, tantu eksterno komo interno, pero nunka a sukumbí, pues e tin kuné e forsa poderoso di Esun  ku a primintié: “i riba e baranka akí lo Mi traha mi iglesia; forsa di morto lo no triunfá riba dje” (Mateo 16,18).

Apesar di divishon, nos por bisa ku tur esnan ku ta trata na ta fiel na Kristu, aunke pa kamindanan diverso, ta pertenesé di algun manera na su Iglesia.

Esta bunita tabata ku nos tur kristian lo a forma filanan den un solo Iglesia! Pero esaki ta algu ku os lo mira únikamente ora nos bini huntu, por fin, den kas di Tata.

Arnaldo Bazán