Kriminalnan na Colombia: Ta asesiná un agente polisial i herida otro seriamente

BOGOTA – Ayera alrededor di 9’or di anochi deskonosínan ku tabata riba un motersaikel di un forma traishonero a ataka dos agente polisial ku tabata patruyando na e munisipio ku yama Yarumal na Antioquia.
E atake arma riba e dos agentenan aki tabata asina brutal ku un di e agentenan a risibí 12 tiru di bala.
Miéntras ku e otro agente polisial ku a trata na kore bai pero a risibí vários tiru di bala den lomba i pia pero a logra sobrebibí. General Gustavo Franco hefe di kuerpo polisial na Antioquia a splika ku e dos agentenan ku a keda ataka a keda identifiká komo Sergio Yepes Páez i Luisa Fernanda Zabaleta.

General Gustavo Franco a bisa ku Ministerio Públiko di Repúblika ta ofresiendo un rekompensa di 50 mion peso ku ta ekivalente na $11.200 pa kualkier informashon ku por kondusí na aresto di e dos sikarionan ku a tira riba e dos agentenan polisialnan aki.