Korte di Hustisia a ordená: Investigashon riba broyo di 100.000.000 Euro!!

WILLEMSTAD. Dia 17 di yanuari ultimo Korte di Hustisia di nos Antia a tuma un desishon pa apuntá un investigadó pa averigua tur detaye rondó di un pago di 100 mion Euro na pago di dividendo c.q. repartishon di ganashi na aña 2017 na Kòrsou kasi direkamente despoues ku dos sosio a funda e kompania offshore.
Korte lo apuntá un investigadó pa raporta detayenan di e repartishon di 100 mion Euro poko dia despues ku Solid Holding i Britannica Guarantee National Insurance Company – c.q. BGNIC a lanta e kompania na Kòrsou.
BGNIC su sede atministrativo ta na Cayman Islands i e otro sosio ta Solid Holding N.V. ku sede na Korsou.
Solid private Foundation a lanta dia 24 di mei 2017 i nan ofisina ta keda den Hoogstraat 18 ku awendia a ser konverti den un kaya di restorant eksklusivo i ofisina di Offshore.
Gran parti dje kapital ku tin den e kompania Offshorfe ta herensia di difuntu Igo Israel Perry ku ela laga pa su viuda i yunan.
Herederonan dje inverhonista ku a muri ta su viuda di dos yu muhé.
E herederonan di e akshonista ku a muri a pidi korte pa laga investigá andansanan den e kompania i ta ken a emiti akshonista na balor di 100 mion euro sigí pa pago di un dividendo di mesun montante stail di ‘hinka-saka’ i komo cherry riba e bolo a fia 15 mion euro serka e kompania.
BGNIC di Cayman Islands a kuminsa un kaso kontra Solid den korte na Kòrsou pa investigá e desishon di paga dividendo mientras ku na Cayman Islands Solid a kuminsa kaso kontra BGNIC stail di Tik-Tak.
Esaki tabata un prosedura pa haña klaridat riba e pregunta si e struktura di Trust ku e tata difuntu a lanta ta kompatibel ku lei israeli di propiedat i kapital matrimonial of si e tata a dwalu baiendo tras di informashon i konseho robes.
Solid opviamente a purba anula tur e prosedura argumentando ku e enkuesta ku Korte a ordena no por tin sentido mas pero Korte no a bisa ‘ni boe ni ba’ pa keda imparsial riba e argumento aki.
E firma Offshore tin un fondo tambe na Singapore ku tin invershon supstansial riba kual tin pleitu legal ken te doño.
Korte na Kòrsou ta haña ku no tin sentido pa pospone e enkuesta riba verasidat dje pago di dividendo pasobra kon ku sea e resultado, e kosto dje proseso enkuesta no ta dje importante ei.
Ademas tin ku pidi oferta promé ku duna enkargo pa e enkuesta.
E sosio na Bahamas a pidi pa nan tambe ta envolvi den e enkuesta pero wes a ninga esaki pasobra no tin motibu pa deskonfia den invershonnan ku e herederonan dje israeli a hasi i tampoko ke rèk e kaso pa negosha un areglo.
Korte a disidi ku ta duna e investigadó orden konkreto ta kiko e mester investigá ku ta e pago di ganashi 100 mion euro poko despues ku a lanta e kompania i ki ròl e dos yunan dje akshonista difuntu a hunga den e broyo di 100 mion euro aki. Korte a duna plaso di 6 siman pa kontrata un investigadó.