Korte di Hustisia a duna SVB rason pa keda sin paga faktura

WILLEMSTAD. Un sentro mediko lokal no a haña rason serka Korte di Hustisia Komun den e kaso di apelashon ku nan a entama kontra SVB pa haña pago pa nan fakturanan ku forsa retroaktivo. Dado momento SVB a stop di paga e fakturanan ku SRMI tabata manda pa servisio dje radiólogo ku nan tabata usa pero ku no tabata registrá na Ministerio di Salubridat pero ku sí tabata kalifika.
Segun e sentro mediko, si nan no tabatin un radiólogo registrá, esaki no a afektá kuido mediko di kalidat i no tabatin keho ni reklamo.
Ademas no por t’asina ku ta usa e trabou diagnostiko dje sentro na benefisio di klientenan di SVB pero e sentro no ta haña kompensashon i nan ta perde hopi sèn si SVB no paga e fakturanan kompleto.

OPINION DI
KORTE
Korte di Hustisia no ta di akuerdo ku e argumentashon aki pasobra pa SVB alto kalidat di kuido mediko ta masha importante.
Ta bou di e kondishon aki nan ta usa servisionan di e sentro mediko.
Komo ku e sentro SRMI ta traha ku radiólogonan eksterno, no por a garantisá kalidat di nan trabou durante un periodo ku no tabatin radiólogo registrá ya ku despues dje tratamentu no por evalua kalidat den e servisio.
Ora SVB a disidi ku nan no ta paga e diagnóstikonan, nan a tene debidamente kuenta ku e konsekuensia finansiero pa e sentro.
Ademas Korte a husga ku SVB korektamente a manda puntra si tabatin radiólogo na SRMI i 8 luna a pasa sin ku nan a haña reakshon te ku nan a disidi pa no paga e fakturanan.
I esei ta solamente durante un periodo di seis luna siendo ku SVB tabata sa muchu mas promé SVB tabata ku e sentro no tabatin radiólogo registrá den servisio.
E desishon di SVB no tabata inhustu ademas ku esei no a pone e sentro den peliger finansiero.
Summa summarum, Korte di Hustisia a rechasá e apelashon di e sentro mediko.