KORTE A KAMBIA SENTENSIA DEN E KASO DI MICHELANGELO PENIJN

WILLEMSTAD – Anteriormente, esta 6 di yüli 2022, korte di promé instansia a dikta un veredikto den kua e siudadano Michelangelo Penijn a keda sentensiá na un kastigu di prizon di 10 aña, kitando e periodo ku el a pasa den aresto preventivo, mas e hecho ku e lo mester keda bou di tratamentu spesial di un instituto gubernamental.
Esaki pa motibu ku dia 10 di novèmber 2021 el a asesiná e siudadano E.F. Penijn (su tio), hinkando esaki ku un kuchú den lomba. Algun luna despues korte mes a haña ku e kaso aki mester keda tratá di nobo i esei a sosodé entre otro dia 4 di novèmber 2022. Abogado di e akusado Michelangelo Penijn tabata mr. H.S. Johannes, siendo den representashon di Ministerio Públiko tabatin señora S.R.C.Polderman. Wes mr. J. Snitker ta esun ku a dirigi e seshon den korte. Tur esaki ta relashoná ku un suseso trágiko i doloroso ku a tuma lugá dia 10 di novèmber 2021 den e bario Marie Pampoen, na un kas den Balaoestraat.
Den e prosèsverbalnan presentá pa polis ta deskribí en ekstenso loke a sosodé, esta ku tabatin un pleitu entre mama ku yu, pero ku e yu aki a hinka su mama ku un kuchú ku e mama tabatin den su man pa kòrta fruta.
E mama a keda heridá den barika i tabata bludu sin fin. Despues ku e tio di Michelangelo a mira ku su ruman muhé tabata bludu na su barika, el a kana bai telefon pa yama pa pidi asistensia pa e señora, pero e hòmber aki, esta Elvio Penijn (ruman di e mama) tambe a keda hinká ku kuchú den lomba.
E hinká ei propiná pa Michelangelo den lomba a resultá e tio unu mortalmente. Abogado di e hòmber Michelangelo Penijn durante e defensa a trese padilanti ku su kliente Michelangelo, no opstante e hecho ku el a hinka ku kuchú, ku nunka e tabatin e intenshon pa asesiná e hòmber Elvio Penijn (esta su tio).
Sikiater G.E. Matroos den su rapòrt fechá 30 di yanüari 2022 a konstatá ku Michelangelo Penijn ta sufri di halusinashon, ta skucha bosnan ku ta dun’é sierto enkargonan, komo tal no por hasi diferensia entre loke ta pasa real òf nò.
Tambe ta asina ku Michelangelo Penijn ta un uzadó di droga. Na momentu di e suseso Michelangelo Penijn no tabata konsiente di loke ta pasando, segun e abogado. Otro profeshonal, esta un sikólogo tambe a konkluí den un rapòrt di 25 di novèmber 2021 ku Michelangelo Penijn tin problemanan mental, anto ku e kombinashon di malesa mental i uzo di droga a kondusí na e susesonan ariba menshoná.
Korte a base di e rapòrtnan di tur e profeshonalnan konsultá kuné, no por tene Michelangelo Penijn responsabel pa su aktonan i ku e posibilidat ta grandi ku e hòmber aki lo sigui hañ’é den situashonnan manera a sosodé dia 10 di novèmber 2021. Ku un kuchú di kushina el a heridá su mama peligrosamente pa despues asesiná su tio, propinando esaki ku hinká den lomba. Mas aleu a bini padilanti ku mama di Michelangelo a kana kaminda di dòkter i instansianan importante pa haña tratamentu pa su yu, pero tur esei tabata enbano. Bario kompletu tabata sufri di menasa i momentonan di eksesonan ferfelu kousá pa Michelangelo Penijn su eksploshonnan emoshonal.
Enfin, un kastigu di 10 aña den prizon no ta hustu, mirando e sirkunstansia ku e hòmber aki no ta responsabel pa su aktonan.
E úniko desishon realista segun korte ta pa pone e akusado na disposishon di gobièrnu. Komo tal ta yega na un veredikto kaminda korte ta imponé un kastigu di prizon di 2 aña, kitando e periodo ku el a pasa den aresto preventivo, pero ku mas aleu ta pone Michelangelo Penijn bou di kuratela di gobièrnu, inkluyendo tratamentu spesial.