Kòrsou tin kabuya di horka di Naf. 900 mion

DEN HAAG. Den ousensia di e presidente regular di e komishon di Relashon den Reino a toka e parlamentario Jorien Wuit pa dirigi e reunion kaminda a diskuti ki te perspektivanan pa Kòrsou, Aruba i Sint Maarten por paga e debe di sentenares di florin tin den nos futuro.
No ta muchu dia pasá ku frakshonnan koalishon a balia di húbilo ku e kompromiso pa kumpli ku e programa di COHO ta bou di mesa, nan a ignorá tiger ku tabata den sala huntu ku nan den sala.
Un tiger den forma dje menasa ku ta kologá manera e sabel di Damocles of e kabuya di horka riba kabes di nos pais i nos futuro generashon.
Esei talbes ta e aspekto mas preokupante dje manifestashon ignorante ku un grupo di parlamentario a desplegá ora a hinka COHO den frizer.
E parlamentarionan ku ta sostené gabinete Pisas a grita di húbilo komo sifuera ta yabi di porta di Walhala Hulanda a duna Kòrsou pa hiba un bida eterno di bienestar.
Loke a pasa en realidat ta ku e desishon ku di Sekretario di Estado Van Huffelen a tuma pa skuif pago dje debe dilanti a krea un divishon grandi den parlamento hulandes i a destrui hopi bon boluntat pa nos pais i nos hendenan den Tweede Kamer.
Despues di a sinta mira e debatenan ku tabatin den Tweede Kamer ayera, por a konstatá ku tin un grupo di parlamentario ku no ta konfia gabinete Pisas pa nada.
Ultimo 10 aña despues di 101010 i e añanan promé ku 101010 gobièrnunan dje pais aki a demostrá ku nan no por goberná sin defisit.
E desishon di Van Huffelen ta komparabel pa enkargá e raton pa warda e paki di keshi ya ku e ta kaba manera manteka ta smèlt den e solo di Kòrsou.
Pero loke ta mas sensurabel ainda i esaki ta konta pa Hulanda tambe, ku ta bolbe duna e partido ku a praktikamente hundi Kòrsou finansieramente, un chèns mas pa ripiti e hazaña.
Es ku e frakshon di MFK mes a bende nan yerba pa e forma intensivo ku nan a selebrá e hecho ku COHO ta for di mesa.
Parlamentarionan hulandes a keda preokupa pe forma ku politikonan lokal a presenta desishon manera bonus di gratifikashon.
Naturalmente tabatin partidonan sosialista ku a aploudi ku a hinka COHO den frizer pasobra esei ta nan filosofia.
Un parlamentario hulandes a papia palabra kla: “Nos a papia demasiado kaba i ta tempu pa traha i tuma desishonnan difisil. Ku pasito chikitu pais no ta progresa i Van Huffelen tin ku stop di papia i eksigi pa gobiernu Pisas kuminsa traha pa Kòrsou bai topa otro krisis”.
Di manera ingenuo Van Huffelen a splika ku e tin konfiansa ku gabinete Pisas lo kumpli i ku lo pone esaki pretu riba blanku aki dos luna.
I pa no lubidá, e suma di 900 mion florin ku Kòrsou debe Hulanda naturalmente ta un gota den e tobo di debe di e miles di florin ku Kòrsou debe Hulanda.