Kòrsou tin hopi di ofresé turista komo destinashon di salú i bienestar

WILLEMSTAD – Djamars ultimo, CHATA, ku ta representá interes di mas ku 250 miembro den sektor di hospitalidat i turismo, a organisá e promé reunion di CHATA Health& Wellness Taskforce, esta pues e task force di salú i bienestar.
E seshon aki a tuma luga na The Space Curaçao, ku presentashonnan di sra. Suzy Camelia-Römer i sr. Rudolf de Wit di Kòrsou Salú i tambe eksperto i coach internashonal di salú i bienestar, sr. Lazlo Puzcko di Health Tourism Worldwide, kende ta bishitá Kòrsou e siman aki for di Budapest.
E mainta a kuminsá ku un introdukshon di e Direktor di CHATA, sra. Maria-Helena Seferina-Rojas kende a yama bonbiní na tur presente.
El a enfatisá ku Kòrsou tin hopi di ofresé riba tereno di salú i bienestar.
Sra. Suzy Camelia-Römer a presentá un strategia pa desaroyá Kòrsou komo un destinashon di salú i bienestar.
Ela komparti un bista di e merkado global i elaborando riba e strategia pa desaroyo di un destinashon di salú i bienestar, a splika ku gobiernu mester introdusi un struktura regulatorio den e kuadro aki.
Esei ta nifika pa fasilita entre otro práktikanan no-medisinal di salú i bienestar, práktikanan medisinal tradishonal, komplementario, kalidat di servisio di salu i bienestar, lokalidat nan speshal i insentivanan ekonómiko.