Kòrsou ta sinti falta di un minister di Salubridat !

WILLEMSTAD. Den un komentario fuerte e miembro di frakshon di partido PAR, Ana Maria Pauletta, a denunsia un situashon ku su koleganan di koalishon i oposishon ta sera wowo pe, esta, ku praktikamente Kòrsou no tin minister di Salubridat.
Komunidat kompleto por mira kon nos Salubridat dia pa dia ta bayendo atras, pa falta di toma di desishon i atenshon nesesario di e minister di Salubridat.
E atenshon di Minister Pieterz-Janga pa e reto grandinan den área di salubridat ta parse di ta nihil. A bira un kustumber ku petishon pa reunion di e trahadónan den kuido, no ta haña reakshon òf ta haña komo kontesta; ‘ku no tin tempu pa reuní’. Tin gruponan den kuido ku ta wardando 8 luna riba un reunion. Pero e realidat ta ku minister si tin tempu pa biaha i partisipa na aktividatnan di plaser.
Kontinuidat di kuido di ambulans pa nos komunidat, kuido di nos grandi i enfermonan, kuido hospitalario, kuido di salú mental, kuido di wowo i garantia di e fondonan nesesario pa kubri e pakete di kuido ta algun di e aspektonan ku ta di preokupashon urgente i ta wardando riba desishon i atenshon di e minister di Salubridat.
Komo miembro di Parlamento, sra. Ana Maria Pauletta a manda diferente karta pa minister di Salubridat ademas a pidi reunion ku minister sin ningun kontesta.
Dùs ni e área di kuido, ni Parlamento no ta risibiendo ningun reakshon di minister di Salubridat sra. Pietersz-Janga.
Ainda Parlamento ta en espera pa minister su karta pa BZV, kaminda e ta drai bèk su desishon. CFT den su último karta a ekspresá preokupashon pa ku e sektor di kuido.
Ana Maria Pauletta a hasi un yamada urgente pa Minister di Salubridat pa kambia e enfoke for di kosnan di plaser i kuminsá enfoká riba e problemanan serio den nos salú públiko.
Kuido di nos salú ta na base di bienestar di nos komunidat i nos pais no por pèrmit pa tin un minister ousente, sin enfoke i sin un vishon.