Kòrsou ta sinti falta di un lider Sindikal independiente

WILLEMSTAD, Na Memoria di Felix Chakutoe, su mama Ana Hooi i sindikalista Jacqueline Cras
100 aña pasá trahadonan den haf a bai wèlga bou di liderato di e marinero Felix Chakutoe pa eksigí deréchinan laboral. E siman aki nos a konmemorá 100 aña di sindikalismo i di solidaridat, lokal i internashonal.
Aktualmente Kòrsou ta den un gran krisis ekonómiko, laboral i humano, kousá parsialmente pa e krisis na Venezuela, seramentu di PdVSA i mas resien COVID 19.
Ta bin aserka ku nos poblashon ta disminuyendo, gradualmente e habitantenan di Kòrsou ta birando menos i nos ku tei ainda ta birando bieu.
Ta importante pa konmemorá Felix Chacutoe en bista di desaroyonan di último tempunan aki na Kòrsou. Aktualmente personanan ku tin un trabou fast, formal, tin miedu pa habri nan boka ora tin inhustisia, pa evitá represalia i pa pèrde nan trabou.
Nan ta mantené silensio o simplemente nan ta bai. Manera ta konosi e ultimo 30 añanan hopi di nos hendenan a bai for di Kòrsou, huí bai, Hulanda. E krisis menshoná akí tin un impakto muchu mas grandi pa e miles di trahadónan no registrá.
Nan ta sufri abuso di parti di nan doñonan di trabou, mal pago, eksplotashon o menasa ku ta yama polis pa sera i deporta nan.
Hopi di nan, migrantenan di Haiti, Colombia, Venezuela, etc. a pèrdè nan trabou temporada di pandemia i tambe nan a pèrdè nan pèrmit di estadia. Miles di e trahadónan a purba logra drenta merkado laboral pa via di e programa di Integrashon Responsabel, sin logra pa falta di un doño di trabou. Tin a opta pa simplemente traha independiente.
Awe na aña 2022, Kòrsou ta sinti falta di un persona hòmber of muhé, un lider independiente i solidario pa bosiferá i defendé e miles di trahadonan ku ta biba sin protekshon laboral, ku ta biba ku miedu di kai será pa falta di dokumentu o pa pèrdè tur nan medionan di eksistensia.
Nan ni sikiera tin derechi pa traha, ni independiente ni komo empresario. Simplemente ta prohibi pa traha.
Ta importante mientras nos ta rekordando 100 aña di eksistensia di sindikalismo, pa no tapa wowo pa e sektor informal enorme ku a krese últimamente. Pa evitá eksklushon i eksplotashon. Pa evitá mas informalidat i asina kriminalidat. Laga nos rebibá e spiritu di solidaridat. Ban biba nos kultura di solidaridat, igualdat i fraternidat pa evitá un apartheid entre esnan registrá i formal i esnan invisibel.
Ku mas inklushon tin mas kresimentu ekonómiko, lo krea un balansa nobo den nos infrastruktura sosial i médiko, pasobra tur esnan eksklui por i ke paga nan mes seguro médiko i kumpli ku debernan manera paga impuesto.
Inklui den nos sosiedat e gran forsa laboral invisibel di hende yon ku talento empresarial i profesional. Duna nan un chèns pa registrá i integrá. Pa bienestar di nos tur.
Inchi Witteveen