Kòrsou no a rekuperá di e kontrakshon di 20 porshento di ekonomia di aña pasá

WILLEMSTAD. Aña 2021 a yega na su final i semper ta bon pa refleha i tambe wak pa dilanti na 2022.
E liña korá den 2021 tabata e pandemia i su konsekuenshanan devastador pa nos ekonomia.
Un ekonomia ku a mustra un kontrakshon di 20% na 2020 i ku no a rekuperá den 2021. Den e kuadro aki VBC a traha riba un Plan di Rekuperashon Ekonomiko (“PRE”) pa wak kon huntu nos por sali for di e krisis ekonomiko ku e pandemia a hinka nos aún mas aden.
Nos a presentá e plan aki kaba na gobiernu i tambe na sindikatonan komo “stakeholdernan” hopi importante den nos pais. E liña kora den e plan aki ta ku mester krea mas sentido di urgensha pa kresementu i diversifikashon di nos ekonomia. Ta importante pa meskos ku tin un Tim di Krisis pa atende ku Covid-19, meskos tambe lo ta bon pa tin un krisis tim pa atende ku e krisis ekonomiko ku nos ta aden.
VBC ta suplika gobiernu pa tuma e punto aki seriamanete na konsiderashon i pa instalá un tim asina. E urgensia ku ta wordu refleha den atende ku e krisis di salubridad mester ta mes importante pa nos ekonomia.
VBC ta urgi i hasi un jamada urgente na nos gobiernu, sindikatonan i otro stakeholdernan pa ban uni forsa den un”Crisis Recovery Team” pa konhuntamente saka e ekonomia for di e slump aktual i pa haña fondo pa drecha e situashon sosial ku ta detoriando dia pa dia.
Tin varios inisiativa kual VBC a identifika ku riba termino kortiku por yuda saka nos ekonomia for di den e slump ku e ta aden, pero pa logra esaki nos tin ku kopera ku otro na un nivel ku anteriormente nunka nos a yega hasi.
Korsou ta un isla chikitu i e uniko manera ku nos por sali padilanti ta dor di traha huntu ku otro. Den nos PRE, VBC ta boga pa introdusi e konsepto di “public-private execution teams” pa ehekuta e diferente inisiativanan.