Kòrsou mester di más sindikalista !

WILLEMSTAD – Sektor sindikal mester kuminsá invertí den formashon i edukashon di nan organisashon i miembronan. Asina minister Sithree van Heydoorn a bisa diadumingu na konmemorashon di 100 aña Lucha Laboral. Segun minister van Heydoorn falta formashon den analisá i komprondé un kontrato kolektivo, falta formashon den téknika di negoshasho i formashon den konosementu di nos leinan laboral. Tambe e mandatario ta konstatá ku no tin sufisiente formashon di siudadanonan ku aspirashon sindikal.
Ora ami komo yu di hende humilde, sali for di klase trahadó analisá Felix Chakoeto su komportashon mi ta sinti mi mes orguyoso di mi orígen. Nos orígen ta di hende humilde pero responsabel, nos origin humilde ku no por ser korumpí, pa kosnan di mundu. Pero mas ku tur kos nos orígen ta unu kaminda Dignidat, Honestidat i Forsa pa logra nos bienestar general.
Trabou sindikal ta un vokashon i no un hèrmènt pa buska gloria i fama. Despues di 100 aña di lucha nos no mester tapa nos wowo pa e realidat sindikal ku nos ta biba aki na Kòrsou. Demasiado desunion bou di esnan den área sindikal, ku komo konsekuensia ku a debilitá e forsa laboral sindikal. Van Heydoorn: “ Mi ta kontentu ku den e historia di 100 aña aki mi por a forma parti di un sindikato ku a skohe pa uni forsa ku un otro sindikato na bienestar di e klase trahadó ku nos ta representá i no a skohe pa mas segmentashon.’’ Traha den union ta hopi importante, e minister a sigi bisa, indika ku ora traha den union, por logra adelanto i prosperidat.
Nos ta biba den un mundu kaminda kada biaha di nobo, nos ta keda sorprendé pa desaroyonan ku ta afektá nos salu, nos ekonomia, nos finansa i te hasta nos outonomia, pero tambe kuponan di trabou i mas importante kada un di nos su famia. Den un palabra ta nos tur, mi ta ripití nos tur di un forma òf otro a i ta keda afektá pa e desaroyonan aki.
Ta p’esei na momentu ku nos stòp di mira nos luchanan di forma isolá i nos hiba e lucha for di un perspektiva amplio, kaminda nos ta tene kuenta ku e realidatnan den kual nos ta biba aden, e lucha lo kontribuí na adelanto di Kòrsou kompleto i no na adelanto di un sektor so. Minister van Heydoorn a bisa ku komo siudadano i mandatario e ta baha su kabes i akseptá ku mesters pidi Tula pa e warda un ratu i no wak ainda, debí ku nos tin hopi kos di drecha ainda. ‘Meskos mi ta konvensí ku nos mester pidi Felix Chakoetu tambe pa warda un ratu i no wak ainda, debí ku den sindikalismo tambe nos tin hopi kos di drecha ainda.’