Kòrsou mester balorá trahadó den kuido

WILLEMSTAD- Awe riba dia internashonal di enfermeria, Kòrsou mester realisá kiko ta balor di e trahadó den kuido. Asina presidente di CBV, Anallisa Mathilda a bisa NOBO awe mainta, na selebrashon di Dia Internashonal di Enfermeria na CBV na Veeris.
Anallisa: “Promé kos ku mester para ketu na dje awe, puntra bo mes unda nos lo tabata si no tabatin enfermera òf enfermero”. Mathilda ta bisa ku kada un dje enfermero òf enfermeranan tin un vokashon i ku mester balor’é.
Awe e selebrashon di henter dia ta dediká na e miembronan di CBV. Tin un programa amplio ku ta dura te 12or di anochi.
E presidente di CBV a bisa NOBO ku e ta felisitá i alabes gradisí tur trahadó den enfermeria pa nan trabou.
Relashoná ku e trabounan ku CBV mester traha riba dje, e presidente nobo di CBV a bisa Nobo ku lo konsulta promé ku e miembronan pa despues fiha posishon. Mirando ku tin vários asuntu urgente, e proseso aki ta tuma lugá rápidamente.

Mathilda a remarká ku CBV a haña bon koperashon di stakeholdersnan pa organisá e selebrashon grandi awe.
For di mainta tempran tabatin hopi hende na CBV, pa asistí na e promé parti di selebrashon. Riba e asistensia masal aki, Anallisa Mathilda ta konkluí ku tin aseptashon dje miembronan pa e direktiva nobo.