Kòrsou i St.Maarten mester tuma komo atvertensia loke ku a pasa ku Aruba

WILLEMSTAD – E desishon di Hulanda pa no duna aprobashon na Aruba pa drai bek e rekorte di 5 porshento, mester sirbi komo un atvertensia pa Korsou i Sint Maarten.
Asina analista politiko, Luigi Faneyte ta splika. Segun Faneyte ta trata di un desishon ku ta konserni un medida generiko, pues tantu pa Aruba, Korsou i Sint Maarten. Konseho di Minister di Reino ayera no a bai di akuerdo finalmente pa Aruba por drai bek 5 porshento di e 12,5 porshento di rekorte riba kondishonnan laboral di empleadonan públiko i semi públiko.
Segun Luigi Faneyte, e fastball ku Aruba a pensa di pasa Hulanda, ora ku ela trata e lei di ‘normering topinkomens’ dor di kambia e máksimo di 261 mil florin arubano pa aña i hasié 329 mil florin arubano pa aña, a pone ku Hulanda no a keda kontentu.
Tampoko e hecho ku Aruba a kambia periodo di transishon di dos pa sinku aña.
Faneyte ta bisa ku manera ku ela konstata ku Hulanda no ta kontentu, ela atverti ku lo bai tin konsekusnsia pasobar afsfeaak ta asfspraak. Hulanda a sali for di bon intenshon, for di konfiansa i palabrashon pa duna Aruba lus berde pa drai bek poulatinamente e 12,5 porshentodi rekorte.

Aruba mes a indika ku e ta bai kumpli ku tur e kondishonnan, pero ora ku a yega na tratamentu di ún dje kondishonnan, ku tabata e lei pa maksimalisá salario di direktornan, Aruba, durante tratamentu dje lei aki den su parlamento, a disidi di pasa dos fastball, keriendo ku Hulanda lo no por hasi nada mas unabes ku ela duna akuerdo dia 24 di juni ultimo, pa hala bèk e rekorte di 5 porshento.
Esaki finalmente a resulta fatal pa Aruba, pasobra Konseho di Minister tin e ultimo palabra. Ademas e por bòltu bèk e hecho ku ela bisa ku e ta duna akuerdo, saliendo for dje punto di bista ku Aruba a bisa ku e ta kumpli pero ku tòg e no a kumpli manera mester ta.
Faneyte: ‘’Esei ta un atvertensia pa Kòrsou i Sint Maarten, pa nos no tribi hinka den nos kabes ku nos tambe ta bai purba di pasa fastball, dor di kambia e 263 mil florin antiano pa aña ku ta aplikabel, inkluso e kondishonnan laboral sekundario òf kambia e periodo di transishon.’’