Korpodeko, Aqualectra i Bureau Telecommunicatie & Post ta organisá Go Green Expo 2022

WILLEMSTAD — Korporashon pa Desaroyo di Kòrsou “Korpodeko”, huntu ku Aqualectra i Bureau Telecommunicatie & Post ta organisá Go Green Expo dianan 6 i 7 di mei na Sambil Mall, di 4or di atardi pa 8or di anochi. E meta primordial di evento aki ta pa reïnforsá e kompromiso pa promové desaroyo di energia duradero na Kòrsou, trese mas konsientisashon tokante di e estado aktual i futuro di nos planeta i pa impulsá nos ekonomia.
Bishitantenan na e expo lo tin e oportunidat pa wak i eksperensiá diferente modelo di vehíkulo eléktriko moderno i bon ekipá. Tambe lo tin e oportunidat pa empresarionan pasa eksplorá e posibilidatnan pa transformá e sistema di energia di nan kompania den un sistema duradero. Korpodeko, komo banko di desaroyo, lo tei pa ofresé bishitantenan e posibilidat di finansiamentu di e solushonnan duradero disponibel na 3% di interes pa e promé aña.

Invershon di desaroyo duradero di nos pais
E tres partnernan organisadó ta rekonosé e invershon den energia bèrdè komo un invershon pa largo plaso, ku lo trese bentaha den gastu di produkshon di energia i benefisionan ekonómiko pa nos pais. Durante di e expo aki e partnernan lo presentá i duna informashon di tur e proyektonan i plannan ku nan tin aktualmente i den futuro pa enfoká riba energia duradero.
Huntu ku e 3 partnernan prinsipal organisadó lo tei AMP Motors, Crown Automotives, Eco Volt, HCR Motors Group, JGM Electrical Company, Star Motors, Lure Energy BV, i nLight Power pa ofresé vehíkulonan eléktriko i solushonnan pa energia duradero manera panelnan solar na komunidat.
Dynaf tambe lo tei pa presentá un ‘smart office’ full ekipá ku kamara HD, 2 screen di 70 inch, bateria solar, 12 panel solar i mas. E mesun ofisina inteligente aki tambe tin e kapasidat pa karga vehíkulonan eléktriko, ku lo ta disponibel pa esnan ku ta deseá por hasi un ‘test-drive’ pa sinti e diferensia. Universidat di Kòrsou tambe lo tei presente pa eksponé diferente proyekto di durabilidat ku nan a bini ta traha riba dje durante di e último añanan.

Finansiamentu pa vehikulonan eléktriko i solushonnan duradero
Durante di e expo aki Korpodeko lo tei pa ofresé e posibilidat di finansiamentu pa e solushonnan duradero na Kòrsou. Kreando e plataforma kaminda proveedornan i usuarionan di alternativanan di energia ta topa otro, Korpodeko ta enfatisá lansamentu di su produkto KIP Go Green. Esaki ta un produkto di Korpodeko ku ta ofresé finansiamentu na balor di un interes di 4 pa 5% pa vehíkulonan eléktriko, tantu pa vehíkulonan nobo komo vehíkulonan segunda mano, i pa otro alternativa di sistema di energia, produsí entre otro pa solo bientu i awa. Finansiamentu di vehíkulonan eléktriko via di Korpodeko ta posibel sea pa uso personal òf pa kompania. Finansiamentu di solushonnan pa energia duradero ta posibel solamente pa kompanianan. Por subi https://korpodeko.cw/going-green/ pa lesa mas tokante di KIP Go Green i prepará pa e Expo. Tur persona i kompania ku hasi kompra durante di e Green Expo aki por probechá pa hasi esaki pa solamente 3% di interes serka Korpodeko pa e promé aña.

Bishitá Go Green Expo
Korpodeko, Aqualectra i BTP ta hasi un invitashon na komunidat kompletu i tambe spesialmente nos empresarionan pa asistí na e Expo aki pa wak e posibilidatnan i pa probechá di e momentu oportuno aki pa atkerí solushonnan duradero. Ban uní huntu i sigui konektá nos dushi Kòrsou na e energia bèrdè pa un futuro duradero pa nos tur.