Kontroladó di trafiko aereo tabatin negoshi di limpiesa den aeropuerto

WILLEMSTAD. Un kaso insólito kaminda un kontroladó di trafiko aereo na Sint Maarten tabatin su negoshi di limpiesa den aeropuerto i su doño di trabou mes tabata su kliente.
E profeshonal nunka a pidi gerensia di Juliana Airport pèrmit pa lanta su mes negoshi di limpiesa den aeropuerto i ta ora nan a ripara ku tabatin chanchuyo ku faktura, ela bira sospechoso i a duné retiro inmediato.
Prinsipio dje luna aki wes a trata e kaso dje profeshonal di kontrol di trafiko aereo kende for di 2003 ta traha komo ganando un salario di NAf. 8.124,63 bruto pa luna.
Kontrat dje profeshonal ku Juliana Airport ta bisa ku tin pèrmit por eskrito, e no por traha pa otro hende of kompania ni por tin negoshi ku ta kompeti ku su doño di trabou.
Aña pasá den e kaos ku tabatin den rekonstrukshon di aeropuerto di Sint Maarten, reshershe a arestá dos persona i a listra nan kas i a deskubri kaso di froude.
Ministerio Publiko a saka e informashon indikando ku for di oktober 2021 e no a presenta na trabou i no a manda notifikashon.
Despues dje inval na su kas, a ordené pa presentá na trabou pa duna kuenta i rason dikon nan a detené. Dia ela presentá na ofisina ela insisti ku e no a kometé algun delito pero despues di su detenshon e no a bai traha mas tampoko.
E ta na kas ta keinta banki kobrando salario mientras ku e bataya entre abogadonan pro i kontra a kuminsa.
Nan ke pa e splika ki negoshi e tin na aeropuerto pero ku no tin di haber ku su trabou di kontroladó aereo.
E homber a splika ku e no tin nada di bisa nan.
Na reshershe nan bai direktamente al grano i a puntré kiko un kontroladó di trafiko aereo tin di haber ku trabou di limpiesa.
Ela kontesta ku despues ku orkan Irma a pasa, e aeropuerto tabata un kaos i komo ku e tin un kompania di limpiesa for di 2016, ela ofrese su servisionan i a kuminsa traha.
Ela pidi trabou i a haña trabou serka gerensia di aeropuerto i tur hende tabata konsiente dje trabounan. Di otro banda nunka ela pidi su doño di trabou pa traha pa otro kompania pero tampoko e no por a manda dokumentashon di su empresa Total Keare N.V.
E investigashon ku a sigi a mustra ku nunka aeropuerto no a duné kontrat, no tabatin oferta ni pago pa faktura ofisial i solamente e promé faktura tabatin stempel di aeropuerto.
Pero pió ta ku ningun hende por bisa si su kompania a hasi limpiesa pasobra aeropuerto tabata un kaos total ku yen di hende kanando rònt sin sa ken ta hasi kiko.