Konteiner yen di muebles pa skol i buki ta enrikesé e eksperensha na a.e. Goilo School

Willemstad – E próksimo aña eskolar lo ta un eksperensha nobo pa e alumnonan di A.E. Goilo School después ku nan a risibí konteiner yená ku muebles, material edukashonal i buki ku a keda mandá for di Irene School na Ulanda pa nan.

E muchanan, mayoria di e barionan den bisendario di e skol, lo gosa di un ambiente eskolar diferente ku lo habri nan apetit pa konosementu i tambe ta un estímulo enorme  pa nan maestronan entusiasmá pa duna les.

Refineria di Kòrsou (RdK) i CIBC FirstCaribbean a kolaborá ku Stichting Help de Schoolkinderen di Kòrsou, pa por manda e material pa Kòrsou. Tabatin asina tantu entusiasmo ora e konteiner a yega i a baha esaki, komo e promé di tres konteiner ku a keda mandá ku muebles di skol, material edukativo i buki den forma optimal pero ku no ta keda usá mas pa Irene School na Ulanda.

Stichting Help de Schoolkinderen van Curaçao a intervení pa haña e material i a perkurá pa regla e transporte pa Kòrsou. CIBC FirstCaribbean i RdK a sostené Stichting Help de Schoolkinderen van Curaçao den esfuerso dor di patrosiná e transporte. Di e forma aki ambos kompania a suprayá nan kompromiso ku edukashon i nan sosten na desaroyo intelektual i kreativo di hobennan di Kòrsou.

Sra. Marie-Denise Hoyer, e kabes di skol di Goilo School a bisa: “E muebles nobo, e material di formashon i e bukinan ku nos a haña ta kontribuí pa nos realisá nos ambishon di tin un ambiente na skol ku ta safe, plasentero i agradabel, kaminda e muchanan ta desaroyá nan potenshal máksimo i nan maestronan ta hasi nan trabou ku hopi smak.”

Ela bisa mas aleu: “Nos ta spera ku ansiedat e yegada di e muchanan bèk na skol otro aña ora nan mira nan klasnan ku fasilidatnan ku antes eskásamente nan tabatin. Nos ta gradisí Stichting Help de Schoolkinderen van Curaçao, Irene School na Ulanda, RdK i CIBC FirstCaribbean pa kada un di nan su koperashon na e metomorfosis maravioso aki.”