Konsultorio a konstatá…… Kolaboradornan di frakshon tabata kobra sin nunka presentá na trabou!

WILLEMSTAD. Den e informe ku e ofisina di akountent i varios bufete di abogado ku a traha pa gobiernu pa traha un inventario dje ‘bandidahe’ ku a tuma lugá den e gobiernu promé ku gabinete Rhuggenaath a subi na poder, a Sali na klá ku varios kolaborador di gabinete i frakshon di parlamento nunka a bai traha.
Nan tabata kobra salario simplemente pasobra nan tabata miembro aktivo di un of otro partido den gobiernu.
Es más, e gabinete a aproba kasonan ku forsa retroaktivo despues ku ekspertonan a duna rekomendashon negativo pa nombra of promove tal i kual kompinchi.
Mayoria biaha a duna konseho negativo pa nombra of promove un amtenar pasobra no tabatin plaka riba presupuesto ni plaka den kaha i menos ainda vakatura pa e kompinchi di partido.
Ta simplemente e minister en kuestion tabata tuma un desishon i firma pe i by-pass tur kanal di kontrol di gobiernu..

MOTIBU DJE KONTROL

Di akuerdo ku e informe di Minister Konket, gabinete Ruggenaath a disidi pa hasi e análisis no pa makistá e gobiernu ku a baha sino pa garantisá ku nan no ta topa ku kadaver den kashi ku por tabatin konsekuensianan negativo.
Wèl tabatin indikashon ku kantidat di desishon ku e gabinete promé ku gabinete Rhuggenaath a tuma desishon ignorando reglanan di bon gobernashon totalmente.
Ta p’esei konseho di minister a disidi dia 7 di juni 2017 pa screen tur desishon den e periodo ku gabinete Pisas tabata na mando i ku a tuma desishon ilegal.
Ta trata di desishonnan ku a mara gobiernu na kompromiso ku amtenar i ku a forma un pakete di desishonnan di despedida djis pa kompensá kompinchinan di partido.
Esei a sosodé promé ku gabinete a baha i promé ku gabinete Rhuggenaath a subi.
Ta trata di rapòrt ku varios bufete di abogado a traha manera Henriquez Kostrzewski Law; Soliana, Bonapart & Aardenburg i VanEps Kunneman VanDoorne.