Konsierto ‘Live@MeiMei’ posponé

WILLEMSTAD – En bista di e insertidumbre grandi ku ta reina pa loke ta organisashon di evento ku asistensia públiko, kousá pa e kantidat kresiente atrobe di kasonan di Covid-19, i despues di a konsultá ku esnan direktamente envolví, awe e desishon a kai pa posponé e konsierto ‘Live@MeiMei’. E konsierto aki, un produkshon di e kantante Dibo Doran i e pianista Randal Corsen, tabata programá pa tuma lugá djasabra awor, dia 14 di ougùstùs, na Brakkeput Mei Mei.

Anke ku ku for di salida a anunsiá ku lo tuma e medidanan di prekoushon relashoná ku Covid-19, tòg den kuadro di e último desaroyonan na Kòrsou a disidí pa hala e fecha pa e konsierto aki mas atras, ora e sirkumstansianan ta mas trankil, tantu pa e públiko komo pa e músikonan, den un ambiente muchu mas relahá.

Ta poko difísil pa for di awor anunsiá ki dia e konsierto aki si lo sigui, pero lo anunsiá esei na tempu. Ademas, mas ku klaro ku esnan ku a kumpra karchi kaba por konta ku nan karchi ta keda válido pa e siguiente oportunidat, òf nan por haña nan sèn bèk.