Konseho di minister di Reino no a trata pago di 5% pa empleadonan públiko di Aruba

ORANJESTAD/WILLEMSTAD – Manera a anunsia e siman aki, Gobiernu di Hulanda no ta di akuerdo pa paga e 5% na empleadonan publiko di Aruba. Segun Gobiernu Hulandes, debi ku Parlamento a hasi kambio na e ley di Wever-Croes Norm, e ta di opinion ku Aruba no a kumpli i pues no por paga empleadonan publiko.
Gobiernu di Aruba a reakshona a mesora pa indika ku e no ta di akuerdo ku esaki, pasobra ningun Gobiernu, ni di Aruba, ni di Hulanda por duna un instrukshon na Parlamento siendo Parlamento un entidad autonomo. Gobiernu no por bisa Parlamento kiko pa hasi i kiko no pa hasi. Sigur no si ta trata di su derecho fundamental di trese amienda den leinan.

Prome Minister Evelyn Wever-Croes a indika cu Gobièrno di Aruba i Hulanda ta sigui den deliberashon e dianan aki riba e topiko aki. Konseho di Minister di Reino no a trata e topiko aki e luna aki, pasobra e deliberashon ta tumando luga. Diarason otro siman Minister President Evelyn Wever-Croes ta reuni ku Sekretario di Estado van Huffelen, pa sigui delibera i pa yega na un solushon.