Konfushon di ultimo ora…… Tin espasio pa mas kandidato pa eksplotá Refineria Isla

WILLEMSTAD. Ayera merdia den kareda di dos’or e direktor den funshon di Refineria Kòrsou sr. Chonky de Lannoi a pasa un karta pa akshonista di Refineria di Kòrsou i CRU kaminda ela notifiká nan ku e areglo ku tin riba mesa pa buska un eksplotadó pa e refineria, ta laga espasio pa mas kandidato hasi un oferta pa eksplotá e refineria.
No ta konosí eksakamente kiko ramifikashon dje karta ta nifika ku si tin dos kompania mas ku ta interesa of ta espasio pa un mas tin of ku ta un kandidato ta interesa.

Pasobra si t’asina di akuerdo ku e kampaña ku tin ultimamente di parti dje lider politiko di Pueblo Soberano, te ainda Wangdong Zhenrong lo ta interesa den e refineria.
E kandidato ku a mèldu na gerensia di Refineria di Kòrsou lo por a duna konstansia ku nan tin inmediatamente disponibel 150 mion dòler ku e perspektiva di por disponé di sufisiente kapital pa manehá e refineria.
E grupo ku lo a manifestá nan deseo pa kombersa lo ta representa pa dos konosido empresario lokal kualnan su nomber ta konosi pa redakshon di NOBO.
Ne momentonan aki asina leu ku ta ofisial, CORC te uniko kompania ku ta den kontienda te ainda pa manehá e refineria pero e situashon ta poko konfuso pasobra gobiernu a nombra un direktor nobo pero señor Chonky de Lannoi ta direktor te por lo menos fin dje luna aki.
Ayera tabatin rumor ta sirkulá ku CORC lo a retirá komo kandidato pero no tin konfirmashon di esaki sino ku ta espasio tin pa mas kompania bula den e arena. Di otro banda sindikalista i penshonadonan di Refinera Isla a bishita Monseñor Secco pidiendo pe hasi un apelashon riba señor De Lannoi pa no mete mas ku refineria pero esun no tin nada di haber ku e otro.