Kon por garantisá awa pa bebe durante desaster humano: Spesialistanan riba tereno di awa i energia ta na Kòrsou

WILLEMSTAD – Spesialistanan riba tereno di awa, energia i yudansa humanitario ta na Kòrsou aktualmente.
E profeshonalnan ta partisipa na e Konferensia riba awa fresku, ‘Xploration Coastline Freshwater Conference’, ku a kuminsá ayera i ta dura te ku dia 19 di mei.
Xploration Coastline ta un purifikadó di awa ku ta flota ku ta funshoná riba energia limpi i ta suministrá 1 mion liter di awa pa dia.
E instalashon ta integrá den un ponton ku ta flota i por mov’é na unda e ta nesesario.
E meta ta pa utilisá e purifikadó desde e temporada di orkan 2023 pa ayudo di emergensia den e área Karibense.

Xploration Coastline
Kada aña temporada di orkan ta sòru pa despliegue di ayudo di emergensia den Karibe.
Un di e promé kosnan ku mester regla durante un desaster (di naturalesa) humanitario ta awa limpi pa bebe.
Na e momentu aki organisashonnan di ayudo ta sòru pa awa pa bebe yega e islanan via di barku òf helikòpter pa asina e poblashon tin e promé nesesidat básiko aki na su alkanse.
Esaki hopi bia ta reaktivo, kostoso i ta laga hopi plèstik atras.
Xploration Coastline, mantené i desplegá for di e islanan dentro di Reino por trese kambio den esaki.
Pa motibu di su posishon geográfiko i presensia di outoridat sivil i militar, Kòrsou semper tabatin un ròl krusial den e ayudo di emergensia aki.
Freshwater Conference na Kòrsou
Riba 17, 18 i 19 di mei tin e Freshwater Conference (Konferensia di awa fresku).
Durante e konferensia ta bai trata kon por desplegá i mantené Xploration Coastline na un manera ku ta positivo pa habitante i empresario den e área Karibense.
Spesialistanan riba tereno di awa, energia i ayudo humanitario ta presente na e kongreso aki.
Vanessa Toré (presidente di e komité di maneho di rekurso di awa di gobièrnu di Kòrsou) i Erwin Arkenbout (Representante di Hulanda na Kòrsou, Sint Maarten i Aruba, a hasi apertura di e konferensia.
Prosperidat sosial lokal, duradero i amplio
Xploration Coastline ta un mishon inovativo ku ta desaroyá den kolaborashon ku empresario-, universidat-, organisashonnan di ayudo humanitario i gobièrnu.
E konferensia ta inisio di e kolaborashon aki. Meta ta tambe pa bai den kombersashon ku otro i wak unda diferente inisiativa i ambishon ta reforsá otro.
E pregunta sentral lo ta kon Xploration Coastline por kontribuí na mehorá kalidat di bida dor di:
– Redusí kosto di bida
– Duna sosten na transishon di energia, awa, i alimentashon/agrikultura
– Krea empleo
– Oumentá e resiliensia (klimátiko) di e islanan i nan komunidat den e área Karibense
OceansX, eksplorá bo mes, bo mundu, nos futuro
OceansX ta un empresa sosial ku ta fasilitá un manera nobo di kolaborashon. Un manera ku ta brinda oportunidat na e potensial humano kolektivo, na unda tur hende ku ta partisipá ta saka mihó for di su mes.
OceansX ta asumí desafionan (tambe yamá Xploraties) ku ta rekerí un aserkamentu nobo. Xploration Coastline ta un ehèmpel di esaki.
Asina OceansX ta sòru pa aselerá transishon pa un impakto duradero.
Na 2019, Berend van de Kraats a funda OceansX, entretantu ya kasi 50 persona ta komprometé nan mes ku e movementu aki i ta traha na 6 ‘Xploratie’.