Internashonal
Kompania di aviashon Colombiano Latam lo bai haña pèrmit pa bula pa Venezuela
BOGOTA – Gustavo Petro a bira presidente di Colombia i mesora a kuminsá habri portanan pa hasi komersio riba tur nivel ku Venezuela.
Ayera e kompania Latam Colombia anunsiá ku denter di poko nan lo bai kuminsá ku buelonan diario entre Bogota/Caracas.
Manera ta konosí kaba ku e buelonan di Bogota/Caracas a keda kanselá pa gobièrnu di Nicolas Maduro for di 2020 na momentu ku e pandemia di Covid-19 a kuminsá plama.
Debí na e mal relashon diplomátiko entre Nicolas Maduro i Ivan Duque komersio entre Venezuela i Colombia a paralisá i tambe e konekshon aéreo entre Bogota/ Caracas.
Ta trata aki di un ruta lukrativo debí ku aktualmente tin 2 mion venesolano ta bibando na Colombia i ku esnan ku ta traha lo por biaha pa Venezuela.
E kompania di aviashon Latam ta kedando kla ku departamento Aeronóutiko Sivil pa asina por kuminsá ku 7 buelo pa siman entre Bogota/Caracas. Latam Colombia lo bai tin kompetensia fuerte ku Avianca i Wingo ku tambe ta kedando kla ku nan pèrmitnan.