Komersiantenan por gana plaka pero prèisnan nó mester bira impagabel

WILLEMSTAD – Gobiernu tin komprenshon pa e hecho ku dononan di supermerkado i importadónan ta hasi negoshi pa gana plaka.
Pero hasimentu di ganashi, no mester tin komo konsekuensia ku e prèisnan ta bira impagabel pa komunidat. Ademas gobiernu ta konsidera ku ta su tarea pa perkura pa e hendenan menos pudiente den nos komunidat, tambe por dispone di produktonan alimentisio salú, bon kalidat i pagabel.
Ta pesei, segun minister di Asuntunan Ekonomiko, Ruisandro Cijntje, gobièrnu a amplia e makutu básiko ku 32 produkto. ‘Nos a atende ku e asuntu di makutu básiko pasobra, for di 2012 no a amplia e kantidat di produktonan ku ta den e makutu’.
Artikulonan. Meta di e makutu básiko ta pa e pueblo mas margina i esun menos pudiente por yega na kuminda di bon kalidat di bon nutrishon i pagabel. Ta pesei gobièrnu a amplia e makutu básiko ku e 32 produktonan.
Minister Cijntje a indika ku for di tempu ku a introdusi makutu básiko, semper e dononan di supermerkado i importadonan a bisa ku esaki no ta kumbini nan. Ta un asuntu ku kada bes a keda bin bin dilanti.
Segim e mandataro gobièrnu ta dispuesto pa konhuntamente ku e dos gruponan aki, evalua kiko mas por hasi relashona ku e prèisnan ku ta subi. ‘Den un komunidat kaminda nos tur ta traha ku otro, nos mester por yega na prèisnan mas pagabel pa e komunidat’. Di e otro banda tambe mester tende e doñonan di supermerkado i importadonan oportunidat pa indika kiko ta nan problemanan i diskuti kon por solushona nan.
PREISNAN PAGABEL
Minster Cijntje ta insisti ku primeramente mester garantisá ku pa tur hende den komunidat mester tin prèisnan pagabel. Aktualmente esaki no ta e kaso. Cijntje ta remarka ku ta un hecho ku tin miembronan di nos komunidat ku ta traha den magazijn di e empresanan. E trahadónan aki ta nota por ehempel kon un batch ku a drenta i ta den magazijn su prèis ta subi mientras ku ya a hasi tur kalkulashon di e ganashi riba e produktonan. E komersiantenan ta keda usa keda usa tur sorto di argumento; ku tin guera i ku flete a bira karu. ‘Pero flete no a sigi subi.
Ela subi un bia, pero unabes ku a importe i produktonan ta den bo magazijn eiden e no por haña inflashon’.
Esaki ta pone ku e prèisnan ta bira impagabel pa komunidat, Cijntje ta splika.
Mientrastantu di e otro banda por mira ku gobièrnu ta hasiendo hopi ehersisio pa baha prèisnan di kombustibel. Ta pesei ta importante pa wak e totalidat; gobièrnu mester sigi traha pa tur hende den e pais aki por hala rosea. Cijntje: ‘’Mi ta di akuerdo i mi ta para ariba ku komersiante ta hasi negoshi pa e gana sèn, mi ta sostene e pensamentu ei. Pero e no mester bira algu desproposhonal i prèisnan ta bira impagabel.’’.