Komedia barata di pseudo parlamentario

A PARA BIRA UN mal kustumber ku e lider di frakshon di MFK, Amerigo Thodé ta usa sala di parlamento pa desplegá un aktitut infantil super antipatiko ku un bos froes ku no ta yuda su kousa pa kueste loke kueste imponé riba demas miembronan di parlamento e konsepto ku gabinete Pisas no a faya den e affaire di Refineria i grita kosnan ku e no mester hasi anunsiando ku lo sera èks minister di Hustisia Girigorie.
Su deklarashonnan ta konvensé nos ku somewhere den tempu su desaroyo intelektual i verbal a stanka i ku pueblo tin ku paga hopi plaka pa sinta mira i tende e obra teatral atros aki.
Pa kolmo e aktuashon a bai kompañá di un stail di ‘one-two pùnch’ den kombinashon ku Silvania kende tin e deseo ferviente pa kondená Girigorie te den siglo di siglos.
Simplemente parlamentario di koalishon (“Wie zwijgt stemt toe”!) a konverti sala di parlamento den speelplaats di skol di lushi.
Pa poko lo por tabatin rankamentu di kabei manera otro show horibel di mucha di skol a desplega e siman aki atrobe i kaminda minister di Enseñansa ta e gran ousente pa tuma medida pero ta manera Ponsio i Pilato i no ta interveni.
Nivel baho bergonsoso tabata e melodia son di orkesta ayera i awe nos lo usa un palabra ku hopi tempu nos no a usa pa kalifika loke mester pasa pa e órgano mas haltu di nos pais, ku ta Parlamento, ku a desplegá un konsierto di ‘kakofonie di palabra’, griteria, zundramentu i un falta di desensia i edukashon.
Kualke hende sensato lo a pensa ku despues ku e aktual asamblea parlamentario lo a usa nan sentido komun pa nos uni pa enfrentá e tempu difisilisimo ku nos pais ta aden, pero nada di esei.
Mama dje krio no por a hasi nada pa kontrola e turba pasobra ta un kos masha teribel ta na kaminda pa hustifika un fanatismo asina.
Hende ku no ta bon di salú mester tene duru pa no kai for di stul.
Hende no por tuma e parlamentarionan ku ta temporalmente na poder aki na serio pasobra no ta pa nan popularidat i kapasidat a eligi nan den parlamento.
Ta komo revancha i rechaso di un parti grandi di politiko di PAR hendenan a vota kontra PAR, no pasobra nan a stima MFK.
Lamentabel pero bèrdat ku nos pueblo a yena sala di parlamento ku hopi – no tur – politiko ku no solamente na emisoranan di radio pero awor den parlamento mes ta zundra otro.
Ta solamente ora nan ta di biahe nan tin manera poko bèrgwensa.