Kolegio Erasmo ta selebrá luna di buki a la Bi-ba-bèrdè

WILLEMSTAD- En konekshon ku Siman di Ban Lesa i luna di buki, Kolegio Erasmo a organisá diferente aktividat pa su alumnonan. E meta di e aktividatnan aki tabata pa animá e muchanan pa lesa i tambe alsa nan interes den buki. A habri e temporada ku Siman di Ban Lesa ku tabata mará na e tema di Bi-Ba-Bèrdè (Gi-Ga-Groen). Durante di e siman aki, diferente persona i outornan di buki, manera Richena Maduro, Denise De Jong-Rekwest i Ronny Lobo, a lesa buki pa e muchanan.
Despues di e siman di apertura, klasnan for di Yogatina (pre-eskolar) te ku grupo 8 a pone èkstra atenshon na tur loke tin di haber ku buki i kuenta. E muchanan a siña tokante di e diferente géneronan di kuenta, eskritornan i ilustradónan. Tambe nan a lesa kuenta pa otro i duna forma na e tema Bi-Ba-Bèrdè bishitando Curaçao Rif Mangrove Park pa siña tokante di e diferente sorto di pal’i mangel ku tin na Kòrsou, funshon di pal’i mangel, historia di e besindario di Ref i tokante di e flora i founa di e parke.
Pa sera e temporado, Kolegio Erasmo a invitá diferente persona konosí den nos komunidat pa bin lesa buki pa e muchanan. Entre e personanan aki tabatin nos minister president, Señor Pisas, Diannitsa Genaro, Glenda Sluis, Kate Ronald Martina Thielman, Judith Heldewier, Nihayra Leona, Bryan Goilo i Miriela Kwidama. Un tiki tokante di Kolegio Erasmo: Kolegio Erasmo un skol di fundeshi ku ta forma parti di Fundashon pa Skol Humanista na Papiamentu. Su fundeshi ta basá riba e filosofia Humanista i e ta e úniko skol na Kòrsou ku su idioma di instrukshon ta kompletamente na papiamentu. E aña aki Kolegio Erasmo ta selebrando su di 35 aña di eksistensia.