Kiwanis Club Curaçao ku un tremendo aktividat sosial djasabra último

Djasabra último, Kiwanis Club Curaçao a disidí despues ku nan tabata tin vários luna ta meet via di Zoom pa bini huntu den airu fresku i hasi un enkuentro sosial yamá “, Ban Topa Kiwanis Club Curaçao”. E anochi aki a probechá pa invitá algun persona ku tabata kièr sa mas informashon di e organisashon pa bini un ratu i asina den un ambiente ameno duna informashon pero tambe sosialisá ku otro.
E enkuentro a tuma lugá na Sentro di Bario Otrobanda den aire liber. Sra. Lisandra Martis a duna un tremendo presentashon over di komunikashon i algun miembro di Kiwanis a splika e personanan NO Kiwanis kiko e organisashon ta hasi i un tiki di historia di Kiwanis.
Intenshon ta pa den kurso di un di e dianan ku ta bini, pa organisá un seshon via Zoom ku tur e personanan ku ta interesá pa bira miembro di Kiwanis, pa asina por duna te den detaye tur e aktividatnan ku e organisashon aki ta hasi. Tin ku bisa ku e interes den e personanan no miembro tabata grandi, i Kiwanis Club Curaçao ta karga hopi speransa ku pronto lo por yama bon biní na e personanan aki komo miembro di e organisashon.
Hopi énfasis a wòrdu pone ku Kiwanis ta un organisashon kaminda e mucha tin un lugá sentral no solamente na Kòrsou pero rònt mundu. Un punto tambe ku a bini pa dilanti ta e programa di “Hóben Destaká” ku Kiwanis Curaçao ta efektuando i ku luna pasá a sali den nos konferensia di distrito na di dos lugá den mas ku 100 programa.
Suzette Koko na kabes di e “Membership Committee” huntu ku su team ta hopi satisfecho di kon bunita e anochi a kana i ta mira ku plaser na un enkuentro hopi animá. Ta bon pa bisa ku esnan ku kièr mas informashon di Kiwanis Club Curaçao por tuma kontakto ku Suzette Koko na telefòn 6663530 i kisas por djòin e zoom meeting ku ta bai tuma lugá pronto i asina sera konosí ku Kiwanis. Ta un bon oportunidat pa puntra tur pregunta ku tin i asina bira miembro di un organisashon ku tin bienestar di e mucha na pechu. Hasiendo esaki bo ta duna un kontribushon na bo komunidat di Kòrsou ku bo ta biba aden. Pues no duda dos biaha pa yama si bo ta interesá.
Na final di e anochi a entrega tantu na sra. Lisandra Martis komo na sra. Madelene Felida un plakat di apresio pa nan presentashon.

Riba e potrètnan por mira vários fasetanan di e anochi.