Kinderoorden Brakkeput ta risibi subisidio pa 43 mucha

WILLEMSTAD – Kinderoorden Brakkeput no ta risibindo e yudansa ku nan ta pidi, pa motibu ku Minister R.Larmonie Cecilia a deklará ku nan ta risibiendo supsidio pa un total di 63 mucha, mientras ku e no tin e kantidat di mucha aki bou di su guia. Sinmbargo, e instituto di Kinderoorden Brakkeput ta deklará i tambe a proba pa medio di nan ‘subsidie- aanvraag’, ku nan ta disponé di i ta risibiendo supsidio pa 43 mucha.

Algun tempu pasa, Kinderoorden Brakkeput a duna di konosé ku e tin nesesidat di un suma kuantioso di sèn. Esaki a pone ku a surgi hopi reakshon serka politikonan i den komunidat.

Un dje politikonan ku a ekspresa su mes riba e situashon na Kinderoorden Brakkeput, ta parlamentario Gilbert Doran. Aworaki den un komunikado di prensa, parlamentario Doran ta splika ku e direktor, di Kinderoorden Brakkeput, Raymond Garicho, kende tin solamente dos (2) aña na mando di e instituto, ta enfatisá ku nan no tin ni tampoko kier drenta un diskushon ku ningun Minister tokante gastu i finansiamentu. Lokual Kinderoorden Brakkeput ta deseá ta di risibí un yudansa finansiero, di moda ku e por kubri nan gastunan ku ahinda ta pará habrí.

KONTRIBUSHON
Pa e kantidat di 43 mucha ku ta na Kinderoorden Brakkeput, ta risibi e sosten finansiero repartí di e sigiente manera: 33 via SOAW i 10 via GVI (pues hustisia). SOAW su kontribushon pa kabes pa dia ta na un suma di Nafl 75,76 i esun di GVI ta un suma di Nafl 65,- pa kabes pa dia.
Segun parlamentario Doran, por konklui ku e montantenan aki no ta sufisiente pa finansiá un persona pa dia, teniendo kuenta tambe ku e muchanan aki mester di tantu atenshon médiko i rekreashon pa por funshoná optimal. P’esei e instituto a hasi un petishon formal, pidiendo pa subi e montante aki na e suma di Nafl 115,- pa kabes pa dia, di moda ku nan por kubri tambe tur demas gastunan pa di e institushon i su personal.

Den pasado ora ku tabatin rekorte den presupuesto, mester a manda algun mucha i tambe personal kas pa por a kubri e gastunan. ‘’Pero tene na kuenta ku kada bes ku laga un mucha ku no ta kompletamente kla ahinda bai kas, esaki ta bira un peliger pa nos komunidat. Mirando ku e no tin e guia i struktura nesesario ora e ta su so’’, segun parlamentario Doran. Esaki na su turno, por yega na kosta gobièrnu di Kòrsou Nafl 500,- èkstra pa dia si e mucha aki terminá despues den man di hustisia. Un kantidat pues, muchu mas haltu ku lokual e instituto ta pidiendo awor akí pa kabes pa dia.

Finalmente Gilbert Doran ta menshona ku for di Kinderoorden Brakkeput a sali muchanan ku despues di kaba nan etapa den e instituto aki, a sali bèk den nos komunidat i funshoná optimal, segun regla i struktura risibí. Pues e úniko kos ku e instituto aki ta pidi, ta un man i un yudansa finansiero. Lokual bon mirá nan tin asta derecho riba dje.