Kiko ta un mama?, Papa Francisco ta splika esaki

Papa Francisco durante un Oudiensia General riba djarason a atendé e importansha di mamanan pa sosiedat i Iglesia.

“Un sosiedat sin mama lo ta un sosiedat inhumano, pasobra mamanan semper sa di duna testimonio, inkluso den e pió momentonan, di ternura, dedikashon i forsa moral”, Francisco a bisa durante e katisashi.

E Pontífise a splika ku “mamanan hopi be tambe ta transmití e sentido mas profundo di e práktika religioso” pasobra “den e promé orashonnan, den e promé gestonan di deboshon ku un mucha ta siña, e balor di fe ta inskribí su mes den bida di un ser humano”.

E “mensahe” akí ta “e simia di fe” ku “ta den e promé momentonan asina presioso”.

“Sin mamanan, no únikamente lo no tin fielnan nobo, sino ku  fe lo a pèrdè parti grandi  di su kalor simpel i profundo”, Papa a bisa, pa invitá tambe na mira ku “nos no ta huérfano, nos ta yunan di Iglesia, nos ta yunan di La Bírgen i nos ta yu di nos mamanan”.

E Pontífise a bolbe papia di famia den e katisashi e dia ei, ku el a dediká espesial na mamanan.

Durante e Oudiensia, Francisco a sita Arsobispu di El Salvador, San  Oscar Arnulfo Romero -asesiná na 1980-, kende a bisa ku “mamanan ta biba un ‘martirio materno’”. Ta trata di “un entrega total, sin muchu eksagerashon, den silensio, orashon, e kumplimentu di deber. Bini dunando bida poko poko manera un mama ta hasi pa su yu”.

Ser mama “ta tambe un eskoho di bida” ku ta  “duna bida”, Papa a bisa. Pa añadí: “esaki ta grandi, esaki ta bunita”.

Den e sentido akí, el a rekordá ku promé ku tur kos Iglesia ta Mama. “Den famia e mama tei. Tur ser humano debe bida na un mama i kasi semper ta debe na dje hopi di e   eksistensia propio i susesivo, di e formashon humano i spiritual”.

Ta p’esei, el a lamentá ku hopi be no ta dun’é e importansia ku ta korespondé na dje. “E ta poko skuchá i poko yudá den e bida diario, poko konsiderá den su papel sentral den sosiedat”, el a señalá, i inkluso “hopi be ta probechá di e disponibilidat di mamanan pa sakrifiká nan mes pa nan yunan pa ‘spar’ den e gastunan sosial”.

Pa Papa, “tambe den e komunidat kristian mama no ta semper hustamente balorá, e ta poko skuchá”. Maske ku den sentro di e bida di Iglesia e Mama di Hesus ta”.

E Tata santu a bisa ku “lo ta nesesario komprondé mas su lucha diario pa ta efisiente den e trabou i atento i afektuoso den famia; lo ta nesesario komprondé mihó na kiko e ta aspirá pa ekspresá e frutanan mihó i outéntiko di su emansipashon”.

“Un mama semper tin problema, ku yunan, semper e ta traha. Ami ta kòrda na kas, nos tabata sinku i miéntras un tabata hasi ‘un’, e otro tabata pensa den hasi ‘otro’ i e pober mamá tabata bai di un banda pa  otro. Pero e tabata felis. El a duna nos asina tantu”.

Papa a indiká ku “mamanan ta e remedi mas fuerte pa divulgashon di individualismo egoista” ya ku ‘individuo’ kier men ‘ku no por ser dividí’”. Pero “mamanan, en kambio, ta ‘dividí’, nan mes , for di ora ku nan risibí un yu pa dun’é na mundu i lag’é krese”.

Den e sentido aki, el a bisa ku hopi be e ta pensa riba e mamanan di kua nan yunan a muri den guera. “Hopi be mi a pensa riba e mamanan ei ora ku nan a risibí e karta: ‘Mi ta bisa bo ku bo yu a kai den defensa di patria…’. Pober muhénan, kon un mama ta sufri! Nan ta esnan ku ta duna testimonio di e bunitesa di bida”, el a ekspresá.