Kiko ta nifiká stola? Dikon e saserdote ta pon’é maske no ta mir’é?

E 7 presioso simbolismo di e adorno litúrgiko, símbolo di e dignidat Saserdotal

No ta insignifikante ku Iglesia ke bisti su ministronan ku otro paña propio di e akshon sagrado. E adorno saserdotal, tal manera nan a desaroy’é a lo largu di tempu, ta un ekspreshon di e akshon saserdotal.
E adornonan litúrgiko di awe tin nan orígen den e adornonan saserdotal i levítiko di e Antiguo Lei i despues den e bistínan antiguo di e noble romanonan.
I nan ta destiná na e selebrashon di e santu misterionan di nos fe, nan ta impliká un alto sentido spiritual i nan tin un funshonalidat ritual i un karakter distintivo den e órden di e ministronan. Ku su simbolismo nan ta siña na proveé nos e armanan spiritual den e kombate kontra e spiritu malu.
Denter di e adornonan litúrgiko ta sobresalí, ounke no sea masha evidente na bista, e stola. Stola ta un sorto di banda ku e saserdote òf e obispu ta kologá di su garganta riba e pechu i ta ahustá esaki ku e cíngulo riba e abla i bou di e kasuya.
Den kaso di diákononan e stola ta bai krusá di e skouder robes padilanti i patras na e parti drechi di e sintura; igualmente ahustá ku un tipo di kabuya riba e alba i bou di e dalmática.
Despues di e reforma litúrgiko di Vatikano II ta regresá na e uso original di hiba e stola bou di e kasuya kologá na ámbos banda di e garganta liña règt i paralelo. Te e ora ei i for di e altu Edat Media, tabata hib’é krusá òf den forma di X, semper bou di e kasuya.
E stola lo mester ta di e mesun koló di e kasuya i lo úniko ku ta eksigí ku ta hiba e stola komo dekorashon ta un krus mei mei (na altura di e garganta), ku e ministro ordená ta sunchi promé di poné.
E disiplina aktual ta preskribí su uso den misa, e sakramentunan i sakramentalnan i semper ku tin un kontakto ku eukaristia.
Ta deskonosé ku eksaktitut orígen di e stola, pero lo mas probabel ta ku e ta derivá di e mantel di orashon di e hudiunan i mas espesialmente di e orarium, nòmber ku kua e stola tabata konosí den antigwedat.
E palabra orarium ta un término ku por ser derivá di orare (papia, prediká) –di aki e palabra oratoria-, kombèrtiendo esaki den e adorno den un insignia di predikadornan.
Beibel ta klasifik’é entre i bistínan di honor. For di siglo XII no ta utilisá mas e término orarium, sino stola.
E stola ta bai bou di e kasuya pasobra e stola ta e promé ku ta ser risibí den e ordenashon i e kasuya ta bai riba di tur kos pasobra esaki ta simbolisá e karidat ta kubri tur kos. Bisá di otro manera, karidat ta loke mester salta mas na bista den e saserdote; ta loke e mester distinguí mas ku otro kos.
Simbolismo di e stola
1. E ta símbolo di poder òf e outoridat saserdotal i e ta e símbolo pa ekselensia di e dignidat saserdotal.
2. Komo ku stola tabata bistí utilisá pa personanan di sierto dignidat, e ta simbolisá dignidat di e promé hende, di e hende promé di e piká original.
3. E ta simbolisá e inosensia nesesario pa kumplimentu di e servisio Saserdotal, i e bisti di gloria ku kua e ta ser bistí komo sirbidó bon i fiel dor di Señor den rekompensa di su méritonan. E ta invoká por tantu e trahe di fiesta ku Tata a pone pa e yu pèrdí na ora di bolbe na kas pober i yen di bèrgwensa. Únikamente Dios por duna nos dicho trahe i hasi nos digno di presidí su mesa, di ta na su servisio.
4. Manera e ta ser bistí riba e garganta e ta asimilá un yugo, e yugo dushi di Nos Señor; kier men e obligashonnan di e estado Saserdotal.
5. E ta simbolisá ku e karnénan ku e bon wardadó ta karga riba su skoudernan.
6. E stola tambe ta nifiká e kabuyanan ku kua Nos Señor a ser lastrá na Kalvario.
7. E stola di e diákono ta símbolo di sakrifisio i generosidat den servisio di e komunidat kristian.