Ki ta pasando ku Wardakosta ku ta sumpìña den karni di Silvania

WILLEMSTAD. E siman ku ta kaba awe i ku p’esei nan ta yamé ‘week end’ a finalisa ku un sabor amargo rondó di un instituto esensial pa siguridat di nos pais ku ta Wardakosta.
Empleando e táktika di desviá atenshon di pueblo for di problemanan real kreando un kortina di huma alrededor di premiere Pisas, Silvania a krea un broyo ordinario riba e akuerdo entre Ontvanger i SVB kaminda 19 empleado di SVB ta stashoná na Ontvanger den kuadro di koperashon pa kobra prima pa SVB.
Nan ta empleado di SVB i komo tal nan ta kai bou di areglonan sosial i salarial di SVB ku ta un instituto asina primordial pa henter pueblo ku no por permiti pa politika kousa un deterioro den un relashon ku ta eksisti for di 2015 ku su krekechénan pero ku benefisionan ku ta sobrepasá kwalke kritika of hecho sinsabor.
Solamente ta rekomendabel pa esnan ku tin reklamol riba servisio di SVB, bai purba biba bolu di e kondishonnan di SVB-Aruba i nan lo sinti diferensia.
Ademas kwalke areglo ku SVB tin ku Ontvanger ta sanshoná pa Konseho di Minister i no un mandatario ‘guachafita’ ku no sa nada dje reglanan bou di kual SVB ta funshoná.

WARDAKOSTA
Baiendo al grano riba e tema dje relato aki ku ta Wardakosta, esensia dje historia ta ku na 2021 gobiernunan di Hulanda, Kòrsou, Aruba i Sint Maarten a bai di akuerdo ku mester hasi mas invershon pa kumpra material nobo pasobra no por kombatgi e kontrabanda di droga via laman kui ekipo chatara.
Komo resultado di e akuerdo aki, e kontribushon di Kòrsou a subi di 3,2 mion pa 7 mkion euro pa aña.

A yega e momento ku anunsiando su intervenshon ku pitu i flouta den e asuntu, minister di Finansa ke pa ministernan di Hustisia di Aruba i Sint Maarten baki re-negosha un repartishon di gastu ku Aruba, Sint Maarten i Hulanda pa para e skema di kontribushon nobo siendo ku nos paisnan no a rekupera finansieramente dje krisis di corona i panemia. Komo cherry riba e bolo Ministerio di Hustisia a bai tras dje yamada di Silvania pa pone e dos funshonarionan mas haltu na Ministerio di Hustisia riba non-aktif. Medida ku ta kuadra perfektamente ku e impreshon ku ela krea ku é ta e lider berdadero den gabinete Pisas.
I pa no lubidá: e papel di Wardakosta ta vital den defensa di nos kosta konsiderando e konstante koriente di venezolanonan ku ke drenta Kòrsou pa pasa droga i na kual Wardakosta tin man yen.