Keshia Knight Pulliam a kasa ku aktor Brad James

Keshia Knight Pulliam a kasa siman pasa ku e aktor Brad James. E aktris di 42 aña, konosí pa su aktuashon den añanan ochenta den e serie kómiko The Cosby Show, a partisipá e informashon aki i algun potrèt via su kuenta di Instagram. E seremonia a tuma lugá patras den kura di kas mes. Den The Cosby Show, Keshia Knight Pulliam a aktua bou di e nòmber Rudy Huxtable.
Pulliam i su kasa a konosé otro na 2019 durante filmashon dje serie Pride and Prejudice: Atlanta. Ta Pulliam su di dos matrimonio, e promé tabata ku tata di su yu muhé Ella di kuater aña, e strea di NFL Ed Hartwell. E matrimonio aki no a dura hopi.
Keshia Knight Pulliam tabatin sinku aña di edat ora e la hasi su debut den The Cosby Show. Despues ku e serie a kaba na 1992, Pulliam a sigui den algun pelikula i serie i den 2018 den Celebrity Big Brother.